Prezident Shavkat Mirziyoyev 5-dekabr kuni Toshkent shahrida Xitoyning yetakchi kompaniyalari rahbarlari bilan uchrashuv o‘tkazdi. Bu haqda Zamin.uz xabar berdi.
Uchrashuv davomida ikki tomonlama hamkorlikni kengaytirish, energetika sohasida zamonaviy texnologiyalarni joriy etish va muhandislik yechimlarini qo‘llashga yo‘naltirilgan qo‘shma loyihalar muhokama qilindi. Muloqot chog‘ida Xitoy kompaniyalarining O‘zbekistonda investitsiya loyihalarini amalga oshirishga bo‘lgan qiziqishi ortib borayotgani mamnuniyat bilan qayd etildi.
Joriy yilda Xitoydan 15 milliard dollardan ortiq investitsiya jalb qilish rejalashtirilgan bo‘lib, umumiy loyihalar portfeli 90 milliard dollarga yetmoqda. Energetika sohasidagi hamkorlik alohida e’tibor qaratilgan yo‘nalish sifatida tilga olindi.
Xitoylik sheriklar bilan qiymati 9 milliard dollardan oshuvchi, quvvati 10 gigavatt bo‘lgan 30 dan ortiq loyiha amalga oshirilmoqda. Bundan tashqari, 2 milliard dollarlik 14 yangi loyiha ishga tushirildi.
Uchrashuvda “China Datang” kompaniyasi prezidenti Jou Yuanlong bilan fotoelektr stansiyalarni kengaytirish, yangi quvvatlarni barpo etish hamda qayta tiklanadigan energiya texnologiyalarini qishloq xo‘jaligi va chorvachilik sohalarida qo‘llash masalalari ko‘rib chiqildi. Shuningdek, kadrlar tayyorlash va ilmiy-tadqiqot laboratoriyalarini tashkil etish tashabbuslari qo‘llab-quvvatlandi.
“China Energy Engineering Corporation” kompaniyasi bilan quyosh elektr stansiyalari va energiya saqlash tizimlarini qurish bo‘yicha hamkorlik yuqori baholandi. Muqobil energetika sohasidagi loyihalarni rivojlantirish muhimligi qayd etildi.
“Sinoma Energy” kompaniyasi raisi Men Sinlin shamol elektr stansiyalari qurilishi va shamol turbinalari uchun parraklar ishlab chiqarishni mahalliylashtirish bo‘yicha ma’lumot berdi. Kimyo va qurilish sanoatida chiqindilarni tozalash texnologiyalariga oid takliflar ham muhokama qilindi.
Shuningdek, “Universal Energy” kompaniyasi bilan shamol elektr stansiyalari qurilishini jadallashtirish, “China General Technology” kompaniyasi bilan esa yangi ishga tushirilgan kogeneratsiya stansiyasining samaradorligini oshirish masalalari ko‘rib chiqildi. “Poly Changda Engineering” kompaniyasi vakillari bilan energiya saqlash tizimini qurish rejalari muhokama qilindi.
Mazkur uchrashuv doirasida Xitoy kompaniyalari bilan kelgusidagi hamkorlikni mustahkamlash va yangi loyihalarni jadallashtirish bo‘yicha kelishuvlarga erishildi.
