O‘zbekistonda 615 nafar shaxs afv etildi
O‘zbekiston Respublikasi Prezidenti Shavkat Mirziyoyev mamlakat Konstitutsiyasi qabul qilinganining 33-yilligi munosabati bilan maxsus farmon imzoladi. Bu haqda Zamin.uz xabar berdi.
Ushbu farmonga ko‘ra, jazo muddatini o‘tayotgan, qilgan ishlariga chin yurakdan pushaymon bo‘lgan va tuzalish yo‘liga qat’iy o‘tgan 615 nafar shaxs afv etildi. Bu qaror O‘zbekiston Respublikasi Konstitutsiyasining 109-moddasi 23-bandiga asosan qabul qilindi.
Afv etilganlarning 220 nafari jazodan to‘liq ozod etildi, 123 nafari jazoni muddatidan oldin shartli ravishda o‘tashdan ozod qilindi, 97 nafarining jazosi yengilroq jazo turiga almashtirildi. Shuningdek, 175 kishining ozodlikdan mahrum etish jazosi muddati qisqartirildi.
Afv qilinganlar orasida 9 nafar chet el fuqarolari, 29 nafar ayol, 23 nafar 60 yoshdan oshgan erkaklar hamda 264 nafar yoshlar, shu jumladan, 2 nafar voyaga yetmaganlar bor. Bundan tashqari, 9 nafar shaxs ilgari taqiqlangan tashkilotlar faoliyatida ishtirok etgan.
Farmon ijrosi doirasida afv qilingan shaxslarning oilasi va jamiyatga qayta moslashishi uchun maxsus chora-tadbirlar belgilandi. Ularning ijtimoiy hayotga qaytishi, foydali mehnat bilan shug‘ullanishi va sog‘lom turmush tarzini yo‘lga qo‘yishi uchun mas’ul vazirlik va idoralarga tegishli topshiriqlar berildi.
Ushbu farmon mamlakatda insonparvarlik tamoyillarini yanada mustahkamlashga xizmat qiladi.
