Tog‘li hududlarda qor ko‘chishi xavfi e’lon qilindi
O‘zbekiston Respublikasi Gidrometeorologiya xizmati (O‘zgidromet) tomonidan joriy yilning 10–12-dekabr kunlari kuchli yog‘ingarchilik va havo haroratidagi keskin o‘zgarishlar kuzatilishi mumkinligi haqida rasmiy ogohlantirish berildi. Bu haqda Zamin.uz xabar berdi.
Ushbu holat sababli respublikaning bir qator tog‘li hududlarida qor ko‘chishi xavfi yuzaga kelishi ehtimoli yuqori ekanligi ma’lum qilindi. O‘zgidrometning qayd etishicha, xavf asosan Toshkent viloyatining Bo‘stonliq, Ohangaron va Parkent tumanlarida, xususan, Chotqol tizmasining tog‘li hududlarida hamda Namangan viloyatining Pop tumanida kuzatilishi mumkin.
Ushbu hududlarda yog‘ingarchilikning ortishi va haroratning tez o‘zgarishi tabiiy jarayonlarni faollashtirishi mumkinligi ta’kidlangan. Shu munosabat bilan, O‘zgidromet fuqarolarni, ayniqsa tog‘li hududlarda yashovchilarni, dam oluvchi sayyohlarni va yo‘llarda harakatlanayotgan haydovchilarni ehtiyotkor bo‘lishga chaqirdi.
Xavfli hududlarda harakat qilayotganda yo‘l tanlashda diqqatli bo‘lish, ob-havo ma’lumotlarini muntazam kuzatib borish tavsiya etildi.
