Payme komissiyasi oshirildi: foydalanuvchilar norozilik bildirmoqda
Payme ilovasi orqali kartalar o‘rtasida amalga oshiriladigan P2P o‘tkazmalar uchun komissiya miqdorining oshirilgani foydalanuvchilar orasida keskin muhokamalarga sabab bo‘ldi. Bu haqda Zamin.uz xabar berdi.
Ilgari bu xizmat uchun 1 foiz to‘lov olinardi, endilikda esa 1,1 foiz miqdorida yechim amalga oshirilayotganiga aniqlik kiritildi. Shunga qaramay, payme.uz saytida hanuzgacha eski, ya’ni 1 foizlik tarif ko‘rsatilgan bo‘lib turibdi.
Mazkur masala yuzasidan Zamin.uz muxbiri Payme qo‘llab-quvvatlash xizmati bilan bog‘landi. O‘zini Karina deb tanishtirgan operator komissiya miqdori haqiqatan ham 4 dekabrdan oshirilganini tasdiqladi.
Uning so‘zlariga ko‘ra, bu o‘zgarish ilovani yanada takomillashtirish va xizmat sifatini oshirish maqsadida joriy etilgan. Biroq eng e’tiborga molik jihat shundaki, foydalanuvchilarga bu o‘zgarish haqida oldindan hech qanday xabar berilmagan.
Operatorning izohiga ko‘ra, komissiya miqdori haqidagi ma’lumot faqat tranzaksiya amalga oshirilayotgan paytda ko‘rsatiladi. Bu esa ofera shartlari bilan izohlanmoqda.
Bundan tashqari, ayrim Telegram kanallari orqali tarqalgan ma’lumotga ko‘ra, komissiya miqdori aslida ikki oy avval oshirilgan bo‘lishi mumkin. Ushbu iddaolar vaziyatga nisbatan yanada ko‘proq savollarni yuzaga keltirmoqda.
Hozircha Payme tomonidan rasmiy tushuntirish berilmagan, bu esa foydalanuvchilar orasida norozilik va muhokamalar davom etayotganini ko‘rsatmoqda. Manba: Zamin.uz
