Tog‘li hududlarda qor ko‘chish xavfi e’lon qilindi
O‘zbekiston Respublikasi Gidrometeorologiya xizmati markazi (O‘zgidromet) tomonidan tezkor ogohlantirish e’lon qilindi. Bu haqda Zamin.uz xabar berdi.
Unga ko‘ra, joriy yilning 31-yanvar va 1–3-fevral kunlari yog‘ingarchilik va havo haroratining o‘zgarishi sababli respublikaning tog‘li hududlarida qor ko‘chish xavfi yuzaga kelishi mumkinligi ma’lum qilindi. Mazkur xavf quyidagi hududlarda yuqori bo‘lishi kutilmoqda: - Qashqadaryo viloyatining Dehqonobod, Kitob, Qamashi va Shahrisabz tumanlari; - Surxondaryo viloyatining Boysun, Qumqo‘rg‘on, Sariosiyo va Uzun tumanlari; - Samarqand viloyatining Nurobod, Qo‘shrabot, Samarqand va Urgut tumanlari; - Jizzax viloyatining Baxmal va Zomin tumanlari; - Toshkent viloyatining Bo‘stonliq, Parkent va Ohangaron tumanlari (Chotqol tog‘lari); - Namangan viloyatining Pop tumani.
Shu munosabat bilan tog‘li hududlarda yashovchi aholi, dam olishni rejalashtirayotgan fuqarolar hamda tog‘li yo‘llarda harakatlanayotgan haydovchilardan ehtiyotkorlik choralarini ko‘rish so‘raladi. Qor ko‘chish xavfi yuqori bo‘lgan joylarda harakatlanishda hushyor bo‘lish, qiyaliklar va qor ko‘p yig‘ilgan hududlardan o‘tishda shoshilmaslik tavsiya etiladi.
Yo‘lga chiqishdan oldin ob-havo sharoitini o‘rganib, xavfsizlik choralarini ko‘rish muhimdir. Manba: O‘zgidromet.
