O‘zbekistonda davlat boshqaruvini modernizatsiya qilish va natijadorlikni oshirish maqsadida yangi tizim joriy etildi. Bu haqida Zamin.uz xabar berdi.
Vazirlar Mahkamasi tomonidan qabul qilingan qarorga muvofiq, respublika ijro etuvchi hokimiyat organlari va xo‘jalik birlashmalari rahbarlari hamda ularning o‘rinbosarlari faoliyati samaradorligini baholashda asosiy ko‘rsatkichlar – KPI tizimi qo‘llaniladi. Bu haqda norma.uz xabar berdi.
Yangi tizim doirasida rahbarlar faoliyatining natijadorligi aniq baholanadi, bajarilmaslik xavflarini oldini olish uchun maxsus ekspert guruhlari tashkil etiladi. Ushbu guruhlar KPI ko‘rsatkichlarini ishlab chiqadi va ularning davlat dasturlari hamda “O‘zbekiston – 2030” strategiyasiga mosligini ta’minlaydi.
Shuningdek, sohadagi muammolarni hal qilishga yo‘naltirilgan choralar ko‘riladi. Ekspertlar KPI ko‘rsatkichlarini davlat ilmiy markazlari va boshqa manfaatdor tashkilotlar bilan birgalikda ekspertizadan o‘tkazadi.
Qabul qilingan ko‘rsatkichlarning bajarilishini doimiy nazorat qilish, kamchiliklarni aniqlash va tavakkalchiliklarni bartaraf etish bo‘yicha takliflar tayyorlanadi. Ekspert guruhlarining asosiy vazifasi KPI tizimining davlat strategiyasi va dasturlariga muvofiqligini ta’minlash, budjet mablag‘laridan maqsadli foydalanishni nazorat qilish hamda natijalarni muntazam tahlil qilishdir.
Ushbu yangi tizim davlat boshqaruvida ochiqlik, natijadorlik va javobgarlikni kuchaytirishga xizmat qiladi. Vazirlar Mahkamasining rahbarlar faoliyatini KPI asosida baholashga oid chora-tadbirlariga zarur o‘zgartirishlar kiritildi.
Yangi tizim rahbar va xodimlardan yuqori mas’uliyat, aniqlik va samaradorlikni talab qiladi. Mutaxassislar va jamoatchilik bu islohot natijalarini katta e’tibor bilan kuzatmoqda.
