Tol'yatti shahri jamoasi "Akron" bosh murabbiyi Zaur Tedeev portugaliyalik yarim himoyachi Jedson Fernandeshning Moskvaning "Spartak" klubiga o'tishi haqida o'z fikrini bildirdi. Bu haqida Euro-football.ru xabar berdi.
Unga ko'ra, futbol natijasini faqat moliyaviy imkoniyatlar hal qilmaydi. Har bir klub oldiga maqsad qo'yib, chempionlik uchun kurashishda o'z imkoniyatlarini inobatga olishi kerak.
Tedeevning ta'kidlashicha, u hech qachon boshqa klubning byudjetiga yoki futbolchilarining necha pul turishiga e'tibor bermaydi. U har doim o'z jamoasining imkoniyatlariga tayanadi va raqib futbolchilarining narxi haqida o'ylamaydi.
Uchinchi tur doirasida "Akron" va "Spartak" jamoalari Samarada o'zaro bahs olib bordi. Uchrashuv 1:1 hisobida durang bilan yakunlandi.
Jedson Fernandesh "Spartak" safida ilk marta maydonga tushdi, biroq u o'yinda gol urish yoki golli uzatma berishga erisha olmadi. Ayni paytda "Akron" uch turdan so'ng besh ochko jamg'arib, RPL turnir jadvalida oltinchi o'rinni egallab turibdi.
Jedson Fernandeshning "Spartak"ga o'tishi klub tarixidagi eng qimmat transfer bo'ldi. Turli ma'lumotlarga ko'ra, Moskva klubi ushbu futbolchi uchun "Beshiktosh"ga 25 dan 27 million yevrogacha mablag' to'lagan.
