Madridning “Real” jamoasi Chempionlar Ligasi 1/4 final bosqichining birinchi bahsida Londonda “Arsenal”dan 0:3 hisobida mag‘lub bo‘ldi. Bu natija “qaymoqranglilar” uchun og‘riqli bo‘ldi, ammo eng qizig‘i – Bellingemning o‘yindan keyingi izohi jamoaning ahvolini aniq ifodalab berdi.
"Haqiqat shuki, biz ijobiy natijaga umuman yaqin bo‘lmadik. “Arsenal” juda kuchli edi. Ikkita gol jarima zarbalaridan urildi va bu individual mahorat natijasi bo‘ldi. Lekin to‘g‘risini aytsam, ular yana ko‘proq gol urishlari mumkin edi. Omadimiz kelib, atigi 3ta gol o‘tkazdik", – dedi Jud Bellingem.
Bellingemning bu izohi barcha madridliklarni o‘yga solishi tabiiy. Yevropa sahnasida o‘zining qaytmas xarakteri va kuchli “kambeklari” bilan nom qozongan “Real” bu safar ham muxlislar umidini oqlay oladimi?
Javob uchrashuvi 16 aprel kuni Ispaniyada bo‘lib o‘tadi. Ayni damda jamoa lagerida ishonch bor, ammo birinchi uchrashuvdagi natija va o‘yin sifati “Santyago Bernabeu”da katta ishni talab qiladi.
Endi e’tibor javob uchrashuvida. “Qaymoqranglilar” tarixi bunday murakkab vaziyatlardan chiqib ketish bilan to‘la. Savol shu: bu safar ham shunday bo‘ladimi?
