Ronalduning daromadi Messidan ikki baravar ko‘p chiqdi

Forbes nashrida 2025 yilning eng ko‘p maosh oladigan futbolchilari reytingi e’lon qilindi. Bu haqda Euro-football.ru xabar berdi.

Reyting boshida kutilganidek Krishtianu Ronalduning nomi turadi. Uning yillik daromadi 280 million dollarni tashkil etadi, shundan 230 million dollar maydondagi faoliyatidan, 50 million dollar esa maydon tashqarisidagi daromadlaridan iborat.

Ikkinchi o‘rinda Lionel Messi joylashgan bo‘lib, uning yillik daromadi 130 million dollarni tashkil etadi. Unga tegishli daromadlar 60 million dollar maydondan, 70 million dollar esa boshqa manbalardan keladi.

Uchinchi o‘rinni Karim Benzema egallagan bo‘lib, uning daromadi 104 million dollarni tashkil etadi, shundan 100 million dollar maydondan, 4 million dollar esa maydon tashqarisidan keladi. Keyingi o‘rinlarda esa Kiliyan Mbappe (95 million dollar), Erling Holan (80 million dollar), Vinisius Junior (60 million dollar), Muhammad Salah (55 million dollar), Sadio Mane (54 million dollar), Jud Bellingem (44 million dollar) va Lamin Yamal (43 million dollar) joylashgan.

Ushbu futbolchilar o‘zlarining yuqori daromadlari bilan jahon futbolining yetakchi nomlari sifatida e’tirof etilgan.