Chevrolet kompaniyasi yangi Corvette Grand Sport sportkarini namoyish etdi
Chevrolet kompaniyasi sakkizinchi avlod sportkarining yangi talqini bo‘lgan Corvette Grand Sport modelini rasman namoyish etdi. Bu haqda Zamin.uz xabar berdi.
Mazkur avtomobil standart Stingray hamda quvvatli Z06 modellari oralig‘idan joy olgan. Ishlab chiqaruvchi ushbu yangilikni poyga ruhini o‘zida mujassam etgan, biroq kundalik yo‘llarda harakatlanish uchun moslashtirilgan model sifatida tavsiflamoqda.
Shuningdek, ushbu sportkar General Motors kompaniyasining yangi, 6,7 litr hajmli LS6 V8 atmosferali dvigateli o‘rnatilgan ilk platformaga aylandi. Tashqi ko‘rinish jihatidan Grand Sport ko‘plab detallarni Z06 modelidan o‘zlashtirgan.
Bunga kengaytirilgan kuzov, tajovuzkor ko‘rinishdagi bamperlar va to‘rtta chiqarish quvuridan iborat tizim misol bo‘ladi. Xaridorlar uchun kupe uslubidagi targa hamda ochiq tomga ega rodster talqinlari taklif etilmoqda.
Bundan tashqari, Chevrolet model uchun o‘ziga xos orqa grafika, yangilangan spoyler va maxsus paket orqali uglerod tolali aerodinamik qismlarni tanlash imkoniyatini yaratdi. Avtomobil saloni 2025-yilgi Corvette uslubida yangilangan bo‘lib, unda uchta ekrandan iborat old panel va soddalashtirilgan markaziy konsol dizayni qo‘llanilgan.
Ichki bezatishda yangi moviy rangli mavzu taklif etilmoqda, maxsus cheklangan seriyada esa qizil rangli elementlar va bosh suyanchiqlaridagi o‘ziga xos naqshlar mavjud. Asosiy texnik yangiliklar kapot ostida joylashgan.
Yangi 6,7 litrli dvigatel 542 ot kuchi va 705 Nm aylantiruvchi momentni hosil qiladi. Ushbu dvigatel avvalgi 6,2 litrli qurilma o‘rnini egalladi.
Quvvat orqa g‘ildiraklarga sakkiz pog‘onali ikki muftali uzatmalar qutisi orqali yetkazib beriladi. Shuningdek, gibrid tizimli Grand Sport X talqini ham taqdim etilgan bo‘lib, u umumiy hisobda 731 ot kuchiga ega.
Hozircha avtomobilning tezlanish ko‘rsatkichlari e’lon qilinmagan bo‘lsa-da, ishlab chiqaruvchi barcha modellarda boshqariluvchi amortizatorlar standart tarzda o‘rnatilishini tasdiqladi. Xaridorlar qo‘shimcha haq evaziga kuchaytirilgan tormoz tizimi va maxsus shinalarni buyurtma qilishlari mumkin.
Yangi modellarni ishlab chiqarish Bowling Green zavodida yo‘lga qo‘yiladi.
