O'zbekistonda «Kobalt» avtomobili savdosi qariyb qirq foizga kamaydi
O‘zbekiston avtomobil bozorida uzoq yillar davomida yetakchilik qilib kelgan Cobalt modelining sotuv ko‘rsatkichlari sezilarli darajada pasaygani kuzatilmoqda. Bu haqda Zamin.uz xabar berdi.
Joriy yilning birinchi yarmida ushbu rusumdagi avtomobillardan qariyb 41 ming dona sotilgan bo‘lib, bu o‘tgan yilning mos davri bilan solishtirilganda 26,6 mingtaga kamdir. Raqamlardagi bunday tafovut bozor ulushining qariyb 40 foizga kamayganini anglatadi.
Mutaxassislar ushbu holatni mamlakatimiz avtomobil bozorida raqobat muhiti kuchaygani va iste’molchilar uchun tanlov imkoniyatlari kengaygani bilan izohlashmoqda. Cobalt ko‘p yillar davomida hamyonbop avtomobillar segmentida asosiy o‘rinni egallab keldi.
Uning ommaviyligi texnik jihatdan eng mukammal ekanligi bilan emas, balki narxining nisbatan qulayligi va bozorda boshqa muqobil variantlarning yetishmasligi bilan bog‘liq edi. Biroq so‘nggi vaqtlarda vaziyat tubdan o‘zgardi.
Hozirda xaridorlar zamonaviy texnologiyalar bilan jihozlangan Onix va Tracker kabi modellarga, shuningdek, Kia Sonet hamda BYD kabi xorijiy brendlarning avtomobillariga ko‘proq qiziqish bildirmoqda. Bu modellar turli narx toifalari va kengaytirilgan imkoniyatlari bilan xaridorlar e’tiborini o‘ziga tortmoqda.
Bozordagi umumiy holat tahlil qilinganda, UzAuto kompaniyasining ulushi ham bir yil ichida 82,4 foizdan 77,6 foizgacha pasayganini ko‘rish mumkin. Ushbu raqamlar O‘zbekistonda avtomobil sanoati va savdosi yangi bosqichga o‘tayotganidan dalolat beradi.
Xaridorlarning talabi oshishi va bozorda yangi ishtirokchilarning paydo bo‘lishi tabiiy ravishda yagona modelga bo‘lgan bog‘liqlikni kamaytirmoqda. Endilikda avtomobil tanlashda nafaqat uning narxi, balki qulaylik darajasi, zamonaviy funksiyalari va tejamkorligi ham asosiy mezonlarga aylanmoqda.
