Eronda namoyishlar vaqtida yaralangan yosh taekvondo ustasi vafot etdi
Eronda hukumatga qarshi namoyishlar vaqtida og‘ir jarohat olgan 21 yoshli taekvondo ustasi Mehdi Nosrati Bildashi vafot etdi. Bu haqda One.uz xabar beradi.
Sportchi olingan jarohatlar oqibatida sakkiz oy davomida shifoxonada yotgan va shu vaqt ichida o‘ttizga yaqin murakkab jarrohlik amaliyotini boshdan kechirgan. Uning o‘limiga o‘q otilishi natijasida kelib chiqqan asoratlar hamda o‘pka infeksiyasi sabab bo‘lgani aytilmoqda.
Mehdi Nosrati Bildashi joriy yilning 8-yanvar kuni Tehron yaqinidagi Pakdasht shahrida bo‘lib o‘tgan ommaviy norozilik namoyishlari chog‘ida xavfsizlik kuchlari tomonidan otilgan o‘qdan yaralangan. O‘q uning oshqozon osti bezi va ichaklarini jiddiy shikastlagan.
Dastlab mahalliy shifoxonada davolangan sportchi keyinchalik poytaxtdagi ixtisoslashgan tibbiyot muassasasiga ko‘chirilgan. Sakkiz oy davom etgan muolajalar davomida sportchi o‘z vaznining salmoqli qismini yo‘qotib, 30 kilogrammga ozib ketgan.
Ovqatlanish bilan bog‘liq muammolar va ketma-ket o‘tkazilgan operatsiyalar uning organizmini butunlay holsizlantirgan. Sportchining uzoq vaqt shifoxonada qolishi va qimmatbaho muolajalar uning oilasi uchun ham og‘ir iqtisodiy yuk bo‘lgani ta’kidlanmoqda.
Namoyishlar va inson huquqlari bilan bog‘liq vaziyat Erondagi iqtisodiy inqiroz va turmush darajasining pasayishi sababli boshlangan namoyishlar tez orada siyosiy tus olib, butun mamlakat bo‘ylab yoyilgan edi. Xalqaro inson huquqlari tashkilotlari namoyishchilarni tarqatishda o‘qotar qurollardan foydalanilganini tanqid qilib keladi.
Mamlakatda internet va aloqa vositalariga cheklovlar o‘rnatilgani sababli qurbonlar soni haqida aniq ma’lumot olish qiyin bo‘lib qolmoqda. Ayrim manbalarga ko‘ra, ushbu tartibsizliklar davomida minglab odamlar halok bo‘lgan va o‘n minglab fuqarolar hibsga olingan.
Human Rights Watch tashkiloti ma’lumotlariga ko‘ra, namoyishlarda ishtirok etgan bir qator shaxslarga nisbatan o‘lim jazosi ham qo‘llanilgan. Mehdi Nosrati Bildashi ushbu voqealarda jabrlangan yagona sportchi emas.
Sport jamoatchiligi vakillari orasidagi yo‘qotishlar Namoyishlar davomida yana bir qator taniqli sportchilarning halok bo‘lgani haqida xabarlar mavjud. Jumladan, "Saypa" yoshlar jamoasi a’zosi, 17 yoshli futbolchi Rebin Moradi ham Tehron ko‘chalarida o‘q uzilishi natijasida vafot etgan.
Uning yaqinlari yosh futbolchining orqa qismidan yaqin masofadan o‘q uzilganini ma’lum qilishgan. Shuningdek, Eronning bir qator mashhur klublarida to‘p surgan 47 yoshli sobiq futbolchi Mujtabo Tarshiz ham rafiqasi bilan birga namoyishlar vaqtida hayotdan ko‘z yumgan.
U faoliyati davomida "Traktor Tabriz" va "Mes Kerman" kabi jamoalar sharafini himoya qilgan edi. Hozircha Eron rasmiy idoralari sportchilarning o‘limi bilan bog‘liq holatlarga nisbatan hech qanday rasmiy bayonot bermadi.
