Siz yaqiningizga sovg‘a qilayotgan gulning ramziy ma’nosini bilasizmi?

8-mart – Xalqaro xotin-qizlar kunini gulsiz tasavvur qilib bo‘lmaydi. Ehtimol yangilanish oyi bahorning boshi bo‘lgani uchun hamdir. Ammo sovg‘a qilinadigan gullar faqatgina chiroyi uchun emas, balki ular orqali bildiriladigan ramziy ma’nolar bilan ham ahamiyatlidir. Quyida eng ko‘p tarqalgan gullar va ularning ma’nolari haqida so‘z yuritamiz.

Lola – muhabbat va hurmat

Lola – bahor va yangi hayot timsoli. Qizil lolalar muhabbat va sadoqat ramzi hisoblanadi. Oq lola esa poklik va samimiylikni ifodalaydi. Sariq lolalar esa qadrlash va do‘stona munosabatni anglatadi. Rossiyada lolalar va mimoza eng ko‘p tarqalgan 8-mart sovg‘asi hisoblanadi.

Mimoza – ayollar kuch-qudrati

Ayniqsa, Italiyada 8-martda ayollarga mimoza guli sovg‘a qilish odatiy hol. U ayollarning nozikligi bilan birga, chidamliligi va irodasini ham ifodalaydi.

Atirgul sadoqat va mehr

Qizil rangli atirgullar – muhabbat va sadoqat timsoli. Oq atirgul esa beg‘uborlik, poklik va tinchlik ma’nosini anglatadi. Sariq ranglisi do‘stlik va xushkayfiyat belgisi, pushtirang atirgul esa orzu va noyoblik timsolidir. AQSH va Yevropada atirgullar, liliyalar keng tarqalgan bo‘lib, ular mehr va qadrlash belgisi sifatida taqdim etiladi.

Orxideya – nafislik va latofat

Orxideya nafosat va latofat timsoli sifatida qaraladi. U noyoblik, ziyolilik va tabiiy go‘zallikni ifodalaydi. Bu gulni e’tibor va qadrlash belgisi sifatida hadya qilish mumkin. Xitoyda lotos va orxideya ayollarga mukammallik va poklik belgisi sifatida beriladi.

Spatifillum – ayol baxti guli

Bu gul xalq orasida «Ayol baxti» deb nomlanadi. U oilaviy osoyishtalik va ayollar uchun ruhiy tinchlik ramzi sifatida talqin qilinadi.

Liliya – poklik va mehribonlik

Oq liliya – beg‘uborlik va yorqinlik timsoli, yorqin rangli liliyalar esa yaxshi niyat va yuksak ehtirom belgisi sifatida sovg‘a qilinadi. Fransiyada liliya va romantik gullar sovg‘a qilish keng tarqalgan.

Narsiss – umid va ishonch

Narsiss guli yangi umid va ishonch ramzi bo‘lib, o‘zini qadrlash va mustaqillik hissini anglatadi. Sababi u bahorning ilk kunlarida ochiladi. Uni ko‘proq o‘z-o‘zini rivojlantirish va shaxsiy kuch-qudrat ramzi sifatida ko‘rishadi.

Xrizantema – uzoq umr va tinchlik

Xrizantemalar asosan qadrlash va ehtirom belgisi sifatida berilsa, qizil xrizantema muhabbatni, oqi esa sidqidillik va tozalikni bildiradi. Yaponiyada sakura (gilos gullari) va xrizantemalar ayollarga beriladigan eng qadrli gullar hisoblanadi.

Gul tanlashda nimalarga e’tibor berish kerak?

Gul sovg‘a qilish – bu faqat chiroyli an’ana emas, balki insonga bildirilgan ehtirom va hurmat belgisi hamdir. Gul tanlashda ayolning tabiati, qaysi rangni istashi yoki yaxshi ko‘rishi va gulning qanday ma’noga egaligini hisobga olish muhimdir.

Bayramda ayollarga sovg‘a qilingan gullar ularning nafaqat go‘zallik va nazokatini, balki bor salohiyatini ham namoyon qiladi. Demak, gul tanlashda uning ramziy ma’nosini ham inobatga olish orqali yanada samimiy va chuqur his-tuyg‘ularni ifodalash mumkin.