O‘zbekistonda 2025 yilda 600 ming gektardan ortiq maydonda chigirtka tarqalishi kutilmoqda

O‘zbekistonda 2025 yilda 608,1 ming gektar maydonda zararli chigirtkalar tarqalishi prognoz qilinmoqda. Bu esa qishloq xo‘jaligi ekinlari va yaylovlarga jiddiy xavf tug‘dirishi mumkin. Shu sababli, mart-aprel oylari chigirtkaga qarshi kurash xizmati otryadlari uchun muhim davr hisoblanadi. Hozirda Qashqadaryo va Surxondaryo viloyatlarida keng ko‘lamli kimyoviy kurash tadbirlari olib borilmoqda.

Monitoring va kurash choralari

2025 yil fevral-mart oylarida 424 ming gektar maydonda chigirtkalarga qarshi kuzatuv-nazorat ishlari amalga oshirildi. Monitoring natijalari Locust.uz axborot dasturiga kiritildi. Bu esa zararli hasharotlarning tarqalishini oldindan aniqlash va kurash choralarini samarali tashkil etish imkonini bermoqda.

Kimyoviy ishlovlarni samarali o‘tkazish uchun quyidagi texnika va vositalar tayyor holga keltirildi:
- 42 ta maxsus avtomashina,
- 181 ta traktor,
- 69 ta OVX-600 va 113 ta VP-1 purkagich,
- 584 ta motorli qo‘l purkagich,
- 28 ta suv tashuvchi transport vositasi.

Bundan tashqari, zararli chigirtkalarga qarshi kurash tadbirlarini o‘z vaqtida tashkil etish va samarali o‘tkazish maqsadida otryadlarning dislokatsiya xaritasi ishlab chiqildi. Shuningdek, alohida mobil ishchi guruhlar tashkil etildi.

Hozirgacha amalga oshirilgan ishlar

22 martdan boshlab Qashqadaryo, Surxondaryo va Samarqand viloyatlarida 5468 gektar maydonda kimyoviy ishlov o‘tkazildi. Mazkur viloyatlarda jami 30 ta otryad faoliyat yuritmoqda, ularda 276 ta mutaxassis jalb etilgan. Shuningdek, Jizzax viloyatida ham chigirtkalarga qarshi kurash tadbirlari boshlandi.

O‘zbekiston – chigirtkalarning tarixi areali

Iqlim sharoiti tufayli O‘zbekiston chigirtkalarning rivojlanishi va tarqalishi uchun qulay hudud hisoblanadi. Mamlakatda 200 dan ortiq turdagi chigirtkalar uchraydi, shulardan 6-8 turi to‘da hosil qilish xususiyatiga ega. Ushbu zararli hasharotlar qishloq xo‘jaligi ekinlariga, saksovulzorlar va yaylovlarga katta ziyon yetkazishi mumkin. Shu sababli, har yili ularga qarshi kimyoviy kurash tadbirlari o‘tkaziladi.

Fuqarolar uchun ma’lumot

O‘simliklar karantini va himoyasi agentligi zararli chigirtka tarqalgan hudud haqida ma’lumotga ega bo‘lganlardan quyidagi telefon raqamlari orqali xabar berishlarini so‘ragan:
? 1288
? 71 202 28 88

Eslatib o‘tamiz, zararli chigirtkalarga qarshi kimyoviy ishlov bepul amalga oshiriladi.