Turkiya mashhurlari giyohvandlik tekshiruvidan o‘tdi
Turkiya shou-biznesidagi mashhurlar 8 oktyabr kuni giyohvandlik gumoni bilan tekshiruvdan o‘tkazildi. Bu haqda Zamin.uz xabar berdi.
Ertalab jandarmeriya tomonidan so‘roqqa chaqirilgan ijtimoiy tarmoq yulduzlari, aktyorlar va san’atkorlar kechga borib ozod qilindi. Bu haqda mahalliy NTV telekanali xabar berdi.
Tergov Istanbul Bosh prokuraturasi qoshidagi Qochqoqlik, Narkotik va Iqtisodiy jinoyatlar bo‘limi tomonidan olib borildi. Unda bir necha mashhurlar giyohvand modda iste’moli bilan bog‘liq gumon ostida tekshirildi.
Tekshiruvga tortilgan shaxslar orasida Dilan va Engin Polat, Irem Derichi, Kubilay Aka, Kaan Yildirim, Hadise Achikgyoz, Berrak Tyuzyunatach, Demet Evgar, Duygu Ozashlan, Zeynep Merich Aral, Ozge Ozpirinchji va Mert Yazidjiog‘lu bor. Ayrimlari mamlakat tashqarisida bo‘lgani sababli hozircha tergov ularga nisbatan o‘tkazilmagan.
Jandarmeriya amaliyotida hech kim rasmiy hibsga olinmadi. Istanbulda bo‘lgan mashhurlar viloyat jandarmeriya qo‘mondonligiga olib kelinib, u yerda bayonotlari olindi.
So‘ngra qon tahlillari uchun Adliya tibbiyot muassasasiga yuborildi. Qon va soch tahlillari yakunlangach, ular jandarmeriya xodimlari hamrohligida kechqurun ozod qilindi.
Mashhurlar bu voqeaga o‘z munosabatlarini bildirdi. Hadise ijtimoiy tarmoqlarda “hammasi ortda qoldi” deb aytdi.
Qo‘shiqchi Irem Derichi matbuot anjumani o‘tkazib, tahlil natijalarini omma bilan baham ko‘rishga va’da berdi. Uning advokati Ayshegyul Mermer esa hozircha hech qanday rasmiy ayblov bo‘lmaganini, jarayonlar oydinlashgach jamoatchilikka ma’lumot berilishini ta’kidladi.
Ziynet Salining advokati mijozining xorijda ekanini va bu ishga aloqasi yo‘qligini bildirdi. Giyohvand moddalarni aniqlash uchun turli tahlillar qo‘llanadi.
Eng ko‘p ishlatiladigan usullar siydik, qon, tupuk va soch tahlilidir. Siydik tahlili oxirgi uch kun ichida modda qabul qilinganini aniqlasa, qon tahlili organizmdagi faol modda miqdorini ko‘rsatadi.
Tupuk tahlili politsiya nazoratida qulay usul hisoblanadi. Soch tahlili esa moddadan uzoq muddat foydalanishni aniqlaydi, izlar olti oygacha saqlanishi mumkin.
Natijalar tahlil usuliga qarab 15 daqiqadan 3 kungacha vaqt ichida olinadi. Ijtimoiy tarmoqlarda bu voqea keng muhokamaga aylandi.
Ko‘pchilik buni “mashhurlar orasidagi tozalash amaliyoti” deb baholamoqda. Ba’zilari san’atkorlarning o‘zini oqlashiga ishonar ekan, boshqalar tergovni kengroq davom ettirishni talab qilmoqda.
Shu bilan birga, hozircha hech kim rasmiy ayblanmagan, ammo tahlil natijalari Turkiya ommaviy axborot vositalari va jamoatchiligi diqqatida qolmoqda.
