Saida Mirziyoyeva Samarqandning yangilangan qiyofasini e’tirof etdi
Saida Mirziyoyeva o‘zining rasmiy Telegram-kanalida Samarqand shahriga qilgan sayohatidan taassurotlari bilan o‘rtoqlashdi. Bu haqda Zamin.uz xabar berdi.
O‘zbekiston Respublikasi Prezidentining ma’muriyat rahbari ta’kidlaganidek, shaharda olib borilgan keng ko‘lamli restavratsiya ishlari va yangi ekspozitsiyalar natijasida tarixiy obidalar yangi qiyofa kasb etgan. Xususan, Amir Temur maqbarasi, Ulug‘bek va Tillakori madrasalari hamda Registon maydoni o‘z davrining tarixiy izlarini saqlagan holda zamonaviy ko‘rinishga ega bo‘lib, yangi hayotga qaytgan.
Saida Mirziyoyeva o‘z tashrifi davomida yuzlab noyob eksponatlar, jumladan, Mirzo Ulug‘bekning qo‘lyozmalari va boshqa tarixiy arxiv hujjatlari bilan tanishdi. Shuningdek, Amir Temur tarixiga oid arxiv materiallari endi multimedia shaklida taqdim etilayotgani alohida e’tirofga sazovor ekanligi qayd etildi.
Saida Mirziyoyeva bu maskanni "kuch va ilhom manbai" deb atadi. Ma’lum qilinishicha, yaqin kunlarda YuNESKOning Bosh konferentsiyasi mehmonlari Samarqandning boy tarixiy merosini baholash imkoniyatiga ega bo‘ladilar.
