Nemis aktyori Udo Kir 81 yoshida vafot etdi

Nemis aktyori Udo Kir 23-noyabr kuni 81 yoshida hayotdan ko‘z yumdi. Bu haqda Zamin.uz xabar berdi.

Ushbu xabarni Variety nashri tarqatdi. Udo Kir o‘zining ijodiy faoliyati davomida 200 dan ortiq filmlarda ishtirok etgan va dunyoning mashhur rejissyorlari bilan hamkorlik qilgan.

U dahshat janridagi “Frankenstein uchun go‘sht” (1973) va “Drakulaga qon” (1974) filmlarida bosh rollarni ijro etgan. 1990-yillarda Gas Van Sentning “Mening shaxsiy Aidaho shtatim” dramasida Keanu Rivz bilan birga suratga tushgan.

Shuningdek, u Daniyalik taniqli rejissyor Lars fon Trier filmlarida ham faol ishtirok etgan. Jumladan, “Qorong‘ulikda raqs” va “Melanxoliya” kabi asarlarda rollar ijro etgan.

Bundan tashqari, Udo Kir Gollivudning yirik filmlarida ham ko‘rinish bergan. Masalan, u “Ace Ventura” va “Armageddon” kabi mashhur kartinalarda ishtirok etib, turli janrlardagi rollarni yorqin ijro etgan.