Katta teatrda "Shelkunchik" baleti namoyish etiladi
Alisher Navoiy nomidagi Davlat akademik Katta teatrida Pyotr Chaykovskiyning yangilangan "Shelkunchik" baleti namoyish etiladi. Bu haqda Zamin.uz xabar berdi.
Ushbu spektakl 23, 24, 26, 27, 28, 30 va 31-dekabr kunlari o‘tkazilishi rejalashtirilgan. 2023 yilda "Shelkunchik" baletining zamonaviy talqini rejissyor Maksim Petrov tomonidan sahnalashtirilgan.
Ushbu yangi talqin klassik hikoyani yanada boyitib, uni yorqin sahna sayohatiga aylantiradi. Unda oilaviy oqshomdan boshlab sichqonlar qo‘shini bilan afsonaviy janglar va kosmik ertaklar tasvirlanadi.
Spektaklning musiqiy qismiga dirijyor Alibek Qabdurahmonov rahbarlik qiladi. Sahna bezaklari va liboslar esa tomoshabinlarga yanada kuchli taassurot qoldirish uchun maxsus tayyorlangan.
Mazkur ijroda O‘zbekistonning yetakchi ijodiy jamoalari ishtirok etadi. Jumladan, Katta teatrning balet truppasi, O‘zbekiston Milliy simfonik orkestri, shuningdek, "Bulbulcha" bolalar xor va raqs ansambli sahnada o‘z mahoratlarini namoyish etadi.
Chiptalarni iTicket platformasi orqali xarid qilish mumkin.
