“Ajdaho uyi” seriali to‘rtinchi mavsumda yakunlanadi
“Ajdaho uyi” serialining prodyuseri Rayan Kondal loyiha yakunlanayotganini e’lon qildi. Bu haqda Zamin.uz xabar berdi.
U Escape Hatch podkastida bergan intervyusida serial to‘rtinchi mavsum bilan tugashini tasdiqladi. Ushbu xabar serial muxlislarini hayratda qoldirdi, chunki ular loyihaning uzoq davom etishini kutishgan edi.
Ma’lum bo‘lishicha, uchinchi mavsumning suratga olish ishlari 2026-yil oktyabr oyida tugallangan va hozirda postprodakshn jarayoni davom etmoqda. Shu bilan birga, ijodiy guruh to‘rtinchi mavsum ssenariysi ustida ishlashni boshlagan.
Rayan Kondalning so‘zlariga ko‘ra, loyiha yakuniga yaqinlashayotgani ijodkorlarga o‘zlarining barcha kuch va imkoniyatlarini safarbar qilish imkonini beradi. U tomoshabinlarni oxirgi mavsumda qiziqarli voqealar kutayotganini ta’kidladi.
“Ajdaho uyi” seriali Targariyenlar sulolasi tarixi va Temir taxt uchun olib borilgan dramatik kurashni yoritadi. Voqealar “Taxtlar o‘yini” filmidagi hodisalardan 200 yil oldin sodir bo‘lgan.
Serialning asosiy syujeti malika Reynira va uning o‘gay ukasi Eygon o‘rtasidagi hokimiyat uchun kurashga qaratilgan. Loyiha Jorj Martinning “Alanga va qon” kitobi asosida suratga olingan.
Uchinchi va to‘rtinchi mavsumlar 2026-yilda namoyish etilishi rejalashtirilgan. Muxlislar yoz oylarida yangi mavsumdan ilk kadrlarni ko‘rish imkoniga ega bo‘ladilar.
Shuningdek, uchinchi mavsumda taniqli “Andor” serialining yulduzi ham qatnashgani ma’lum qilindi. E’tiborlisi, “Ajdaho uyi” yakuniy qismiga tayyorgarlik ko‘rayotgan bir paytda, HBO “Taxtlar o‘yini” olamini kengaytirish bo‘yicha yangi loyihalar ustida ishlamoqda.
