Valentino Garavani 93 yoshida Rimda vafot etdi
XX asr modasining eng mashhur va nufuzli dizaynerlaridan biri Valentino Garavani 93 yoshida Rim shahridagi uyida vafot etdi. Bu haqda Zamin.uz xabar berdi.
Bu haqda Valentino Garavani va Giancarlo Giammetti jamg‘armasi ijtimoiy tarmoqlarda rasmiy ma’lumot berdi. U yaqinlari qurshovida osoyishta holda hayotdan ko‘z yumgan.
Valentino 1960 yilda asos solgan Valentino moda uyi orqali jahon modasida o‘ziga xos uslub va maktab yaratdi. U Giorgio Armani va Karl Lagerfeld kabi mashhur dizaynerlar qatorida modaning eng yuqori cho‘qqilaridan biriga erishgan.
Valentino brendi o‘zining qizil rangi, ya’ni “Valentino red” bilan butun dunyoda tanilgan. Ushbu rangga bo‘lgan qiziqish dizaynerning Ispaniyaga qilgan safari chog‘ida paydo bo‘lgani aytiladi.
Keyinchalik esa bu qizil rang brendning ramziga aylangan. Valentino 2008 yilda so‘nggi kolleksiyasini taqdim etganida ham qizil liboslar podiumning asosiy ko‘rinishi bo‘lgan.
Mashhur dizayner bilan vidolashuv marosimi Rim shahrida, Piazza Mignanelli maydonida 21–22 yanvar kunlari bo‘lib o‘tadi. Dafn marosimi esa 23 yanvar kuni Santa Maria degli Angeli e dei Martiri bazilikasida o‘tkazilishi rejalashtirilgan.
