Valijon Shamsiyev yolg‘on mish-mishlarga javob berdi

So‘z ustasi Valijon Shamsiyev o‘zi haqida ijtimoiy tarmoqlarda tarqalgan asossiz mish-mishlar yuzasidan huquqni muhofaza qiluvchi organlarga murojaat qilganini ma’lum qildi. Bu haqda Zamin.uz xabar berdi.

Xususan, uning go‘yoki komaga tushgani haqidagi yolg‘on xabarlar san’atkorning o‘zi va oilasining noroziligiga sabab bo‘lgan. San’atkorning qizi ham ushbu mish-mishlarga javob berib, “Agar dadam komada bo‘lsalar, unda ular mening yonimda qanday yuribdilar?” deya kinoya qilgan.

U bu orqali tarqatilgan xabarlarning haqiqatga mutlaqo mos emasligini ta’kidlagan. Valijon Shamsiyev jamoatchilikka murojaat qilib, bunday asossiz gap-so‘zlar tarqatishda ehtiyotkor va mas’uliyatli bo‘lishga chaqirdi.

Dastlab bu mish-mishlarga e’tibor bermaganini aytgan san’atkor, bo‘htonlar ko‘paygani sababli sukut saqlash imkonsiz bo‘lganini bildirdi. U sog‘lig‘i yaxshi ekanini, farzandlari ham tinch-totuv yashayotganini ta’kidladi.

Shuningdek, shaxsiy hayoti haqida yolg‘on xabarlar tarqatmaslikni so‘rab, bunday holatlar takrorlanmasligi uchun huquqni muhofaza qiluvchi tashkilotlarga ariza berganini qayd etdi.