Taniqli aktrisa Ketrin O’Hara 71 yoshida vafot etdi
Kecha, 30-yanvar kuni, taniqli aktrisa Ketrin O’Hara 71 yoshida vafot etdi. Bu haqda Zamin.uz xabar berdi.
Bu haqda uning agenti ommaviy axborot vositalariga ma’lum qilgan. Ketrin O’Hara Amerika va Kanada fuqarosi bo‘lib, u ayniqsa, “Uyda yolg‘iz” filmidagi Kevinning onasi — Keyt MakKalister obrazi orqali mashhurlikka erishgan.
Ushbu filmda Kevin tasodifan uyda yolg‘iz qoladi va o‘g‘rilarga qarshi kurash olib boradi. Onasi esa o‘g‘lini qutqarish uchun uyga qaytishga shoshiladi.
Aktrisa 1992-yilda suratga olingan filmning ikkinchi qismida ham shu rolni davom ettirgan. Ketrin O’Haraning ijodiy faoliyati 1970-yillarning o‘rtalarida Kanadada boshlangan.
U nafaqat aktrisa, balki ssenariy muallifi sifatida ham faoliyat yuritgan. Aynan ssenariy yozishdagi muvaffaqiyatlari tufayli 1982-yilda “Emmi” mukofotiga sazovor bo‘lgan.
2010-yillarning o‘rtalarida O’Hara yana katta mashhurlikka erishdi. U “Shitts Krik” nomli komedik serialda asosiy rollardan birini ijro etib, yangi avlod muxlislarini ham o‘ziga jalb qildi.
Mazkur serial 2015–2020-yillarda namoyish etilib, jami 6 mavsumdan iborat bo‘lgan. Aktrisa so‘nggi yillarda ham ijod qilishda davom etdi.
Masalan, 2025-yilda “The Studio” serialida ishtirok etgani qayd etiladi. Shuningdek, “Uyda yolg‘iz” filmi hanuzgacha Yangi yil mavsumi uchun eng mashhur filmlardan biri bo‘lib, turli telekanallar va platformalarda muntazam namoyish qilinadi.
Shu sababli, Ketrin O’Haraning Keyt obrazi ko‘plab tomoshabinlar xotirasida o‘chmas iz qoldirgan.
