Sanjar Xoliqov turmush o‘rtog‘i bilan qanday tanishgani haqida gapirdi
Taniqli xonanda Sanjar Xoliqov YouTube platformasidagi loyihalardan birida mehmon bo‘lib, o‘zining shaxsiy hayoti va ijodiy faoliyatidagi tanaffuslar sababi haqida ochiq-oydin so‘zlab berdi. Bu haqda Zamin.uz xabar berdi.
Samimiy ruhda kechgan suhbat davomida san’atkor turmush o‘rtog‘i Asila Abdullayeva bilan qanday tanishgani, oilasidagi o‘ziga xos jihatlar hamda tadbirkorlik sohasidagi ishlari haqida to‘xtalib o‘tdi. Xonandaning turmush o‘rtog‘i Asila Xoliqovaning ta’kidlashicha, ularning tanishuvi ijtimoiy tarmoqlar orqali boshlangan.
O‘sha paytlarda ommalashgan mobil ilovalardan birida o‘z sahifasini kuzatayotgan Asila kuzatuvchilar orasida Sanjar Xoliqov ismini ko‘rib qolgan. Avvaliga bu inson kim ekanligi bilan qiziqqan, biroq uning sahifasida hech qanday ma’lumot bo‘lmagan.
Keyinchalik dugonalari orqali u haqida ma’lumot to‘plagan. Ularning ilk bor yuzma-yuz ko‘rishishi esa Asilaning opasining to‘y marosimidan oldingi qiz bazmi tadbirida yuz bergan.
O‘shanda Asila endigina o‘n yetti yoshda bo‘lgan va Sanjar Xoliqov ushbu tadbirga xonanda sifatida xizmatga taklif etilgan edi. Sanjar Xoliqov ham o‘sha kunni o‘zgacha hayajon bilan eslaydi.
Uning aytishicha, rafiqasining yaqinlarini avvaldan yaxshi tanigan. Tadbir kuni hovlida odamlar orasidan o‘tib sahnaga chiqayotganida, Asilani ko‘rib, qalbida iliqlik his qilgan.
Xonanda ushbu lahzani xuddi kinolardagi kabi sehrli holatga o‘xshatdi. Aslida, Sanjar Xoliqov bundan avvalroq ijtimoiy tarmoqda tasodifan Asilaning suratini ko‘rib qolgan va uni izlay boshlagan edi.
Taqdir taqozosi bilan ular Yorqinxo‘ja Umarovning konsertida ham uchrashishgan. Sanjar Xoliqov o‘sha kuni atayin konsertga borgan va tadbir davomida bo‘lajak rafiqasini kuzatib o‘tirgan.
Oradan ikki yil o‘tib, pandemiya sababli yuzaga kelgan tanaffuslardan so‘ng, ularning nikoh to‘yi bo‘lib o‘tdi. Suhbat davomida san’atkor turmush qurishdan oldingi qarashlari haqida ham gapirdi.
U rafiqasini uchratgunga qadar hech qachon uchrashuvlarga chiqmaganini bildirdi. Ota-onasi sovchilik masalasini ochganida ham, u insoniy munosabatlar samimiy bo‘lishi kerakligini o‘ylab, rad javobini berib kelgan.
Sanjar Xoliqov qizlar uning moddiy imkoniyatlariga emas, balki insoniy fazilatlariga qarab muomala qilishini istagan. Shuning uchun ham munosabatlar masalasiga juda jiddiy yondashgan.
Shuningdek, xonanda oiladagi yana bir muhim va nozik masala — qon guruhi haqida to‘xtaldi. Ma’lum bo‘lishicha, er-xotinning qon guruhi bir xil bo‘lib, u juda kam uchraydigan manfiy rezusga ega.
Tibbiyotda bunday holatlar alohida e’tibor talab qilishi va farzand ko‘rish jarayonida ma’lum qiyinchiliklar tug‘dirishi mumkinligi sababli, oila a’zolari boshida biroz xavotirda bo‘lishgan. Biroq barcha qiyinchiliklar ortda qolib, bugungi kunda ular baxtli hayot kechirmoqdalar.
Hozirda Sanjar Xoliqov san’at bilan birga to‘qimachilik sohasida ham o‘z tadbirkorlik faoliyatini muvaffaqiyatli davom ettirmoqda.
