Koreys seriallari ommalashishi natijasida mashhur aktyorlar daromadi keskin ortdi
So‘nggi yillarda Janubiy Koreya teleseriallari butun dunyo bo‘ylab mislsiz ommaviylashib, kino sanoatida yangi davrni boshlab berdi. Bu haqda Zamin.uz xabar berdi.
Netflix, Disney va Apple TV kabi yirik xalqaro platformalar koreys loyihalariga jiddiy sarmoya kiritishi natijasida mashhur ijrochilarning daromadlari ham keskin ortdi. Hozirgi kunda eng taniqli koreys yulduzlari birgina qismdagi ishtiroki uchun yuz minglab, hatto million dollargacha gonorar olmoqda.
Bu ko‘rsatkichlar koreys kino sanoatining jahon bozoridagi o‘rni qanchalik mustahkam ekanligini anglatadi. Ushbu sohaning eng yuqori haq to‘lanadigan vakillari orasida Li Jon Je alohida ajralib turadi.
U butun dunyoda shov-shuvga sabab bo‘lgan Kalmar o‘yini serialidagi bosh roli orqali xalqaro miqyosda e’tirof etildi. Mazkur loyiha aktyorni nafaqat o‘z vatanida, balki Gollivud darajasidagi yulduzlar qatoriga olib chiqdi.
Ochiq manbalardagi ma’lumotlarga ko‘ra, Li Jon Je ushbu serialning ikkinchi mavsumidagi har bir epizod uchun qariyb bir million dollar miqdorida haq olgan. Bu koreys aktyorlari uchun rekord darajadagi ko‘rsatkich hisoblanadi.
Keyingi o‘rinlarda turuvchi Pak Bo Gom ham koreys kinosining eng talabgir vakillaridan biridir. U turli janrdagi seriallarda yaratgan samimiy va esda qolarli obrazlari bilan tomoshabinlar mehrini qozongan.
Aktyorning mahorati va uning ishtirokidagi loyihalarning muvaffaqiyati sababli, ishlab chiqaruvchilar unga har bir qism uchun o‘rtacha uch yuz ellik ming dollar atrofida gonorar to‘lashga tayyor. Uning keng muxlislar auditoriyasi har qanday loyihaning muvaffaqiyatini ta’minlashga xizmat qiladi.
Shuningdek, koreys to‘lqinining asosiy yulduzlaridan biri bo‘lgan Li Min Ho ham eng boy aktyorlar ro‘yxatidan mustahkam joy olgan. U o‘z faoliyati davomida ko‘plab xalqaro mukofotlarni qo‘lga kiritgan va Osiyo mamlakatlarida katta nufuzga ega.
Bugungi kunda Li Min Ho ishtirok etgan har bir epizod uchun kamida ikki yuz ming dollar miqdorida haq oladi. Bunday yuqori daromadlar koreys ijodkorlarining jahon miqyosidagi nufuzi va raqobatbardoshligi tobora ortib borayotganidan dalolat beradi.
