O'zbekistonda xizmat ko'rsatgan artist Azim Mullaxonovning o'g'li vafot etdi
O‘zbekiston san’at olami og‘ir judolikka uchradi. Bu haqda Zamin.uz xabar berdi.
O‘zbekistonda xizmat ko‘rsatgan artist, Muqimiy nomidagi O‘zbekiston davlat akademik musiqali teatri direktori Azim Mullaxonovning xonadonida motam. Taniqli san’atkorning o‘g‘li Islombek Mullaxonov bevaqt vafot etdi.
Ushbu qayg‘uli xabarni marhumning yaqinlari hamda uzoq yillar davomida Azim Mullaxonov bilan yelkadosh bo‘lib mehnat qilgan teatr jamoasi tasdiqladi. Teatr ahli va madaniyat sohasi vakillari xonandaga hamda uning oila a’zolariga chuqur ta’ziya izhor etmoqda.
Azim Mullaxonov o‘zining ko‘plab suhbatlarida oilasi va farzandlari haqida mehr bilan gapirib kelgan. Xususan, u farzandlari Azizaxon, Feruzbek va Islombekning san’atga bo‘lgan qiziqishlari baland bo‘lsa-da, ularning hayot yo‘li boshqa sohalar bilan bog‘langanini ta’kidlagan edi.
Xonandaning aytishicha, u farzandlarining san’atkor bo‘lishini istamagan va ularga boshqa kasblarni tanlashni maslahat bergan. Bunga sabab sifatida san’at yo‘lining mashaqqatlari va ijodkorlar duch keladigan ijtimoiy qiyinchiliklarni ko‘rsatib o‘tgan edi.
San’atkor o‘z vaqtida bergan intervyularidan birida farzandlarining kelajagi borasidagi qarorini quyidagicha izohlagan edi. U o‘sha davrlarda san’atkorlar uchun moddiy va ma’naviy jihatdan murakkab vaqtlar bo‘lganini, ko‘pchilik odamlar artistlarning hayotini faqat dabdaba va katta daromad deb tasavvur qilishini aytgan.
Aslida esa ko‘plab ijodkorlar, ayniqsa teatr xodimlari oddiy maosh evaziga mehnat qilishini, bozor va do‘konlarda esa ularning tanilgani ba’zan qimmatga tushishini ochiq tushuntirgan. Mana shu kabi hayotiy sabablar tufayli Azim Mullaxonov o‘z o‘g‘illari va qizining boshqa sohalarda barqaror hayot kechirishini afzal ko‘rgan.
Bugun esa butun jamoatchilik ushbu og‘ir damlarda san’atkorga sabr tilamoqda. Marhumning oxirati obod bo‘lsin.
