Xiva shahrida ananaviy Qovun sayli festivali bo'lib o'tadi

Qadimiy Xiva shahri 2026-yilning 7–9-avgust kunlari an’anaviy Qovun sayli festivaliga mezbonlik qiladi. Bu haqda One.uz xabar beradi.

Ushbu yirik madaniy tadbir Ichan qal’a davlat muzey-qo‘riqxonasi hamda Arda Xiva majmualarida bo‘lib o‘tishi rejalashtirilgan. Festival dasturidan noyob qovun navlari ko‘rgazmasi, gastronomik namoyishlar, hunarmandchilik yarmarkalari va taniqli san’atkorlar ishtirokidagi konsert dasturlari o‘rin olgan.

Mazkur tadbir Xorazm viloyatining dehqonchilik an’analari va sayyohlik salohiyatini dunyoga tanitish maqsadida tashkil etilmoqda. Turizm qo‘mitasi va Xorazm viloyati hokimligi hamkorligida o‘tkazilayotgan ushbu bayram davomida viloyatning barcha shahar va tumanlari o‘zlariga xos bo‘lgan qovun navlarini alohida pavilonlarda namoyish etadi.

Har bir hudud uchun ajratilgan maydonlar o‘sha yerning o‘ziga xos tarixi va qadriyatlarini aks ettiruvchi bezaklar bilan bezatiladi. Bu esa mehmonlarga nafaqat shirin qovunlardan tatib ko‘rish, balki vohaning boy madaniyati bilan yaqindan tanishish imkonini beradi.

Xiva yirik turistik markaz sifatida Qovun sayli yildan-yilga nufuzli xalqaro tadbirga aylanib bormoqda. Masalan, 2025-yilda o‘tkazilgan festivalga bir milliondan ortiq mehmon tashrif buyurgan bo‘lib, ularning 300 ming nafarga yaqini xorijiy sayyohlardir.

Bunday yuqori ko‘rsatkichlar festivalning xalqaro miqyosdagi ahamiyati ortib borayotganidan dalolat beradi. Tadbir nafaqat qishloq xo‘jaligi mahsulotlari ko‘rgazmasi, balki o‘zbekona mehmondo‘stlik va milliy qadriyatlar tantanasidir.

Festival dasturi barcha yoshdagi tashrif buyuruvchilar uchun qiziqarli bo‘lishi ko‘zda tutilgan. Mehmonlar uch kun davomida milliy taomlar va Xorazmning mashhur nonlari taqdimotida qatnashishlari, qo‘g‘irchoq teatri tomoshalarini ko‘rishlari hamda folklor jamoalarining jonli ijrolaridan bahramand bo‘lishlari mumkin.

Shuningdek, mahorat darslari, milliy liboslar namoyishi va tasviriy san’at ko‘rgazmalari bayramga o‘zgacha shukuh bag‘ishlaydi. Bayram tadbirlari va asosiy manzillar Festivalning asosiy voqealari ikki xil muhitga ega bo‘lgan majmualarda tashkil etiladi.

Ichan qal’a hududida ko‘proq tarixiy va madaniy tadbirlar, hunarmandchilik namoyishlari o‘tkazilsa, Arda Xiva majmuasi zamonaviy ko‘ngilochar dasturlar va yirik konsertlar maydoniga aylanadi. 24,5 gektar maydonni egallagan ushbu yangi majmuada mehmonlar uchun barcha qulayliklar, jumladan, restoranlar, hunarmandlar rastalari va musiqali favvoralar xizmat ko‘rsatadi.

Festivalning eng kutilgan voqealaridan biri 8-avgust kuni bo‘lib o‘tadi. Shu kuni Arda Xiva majmuasida rossiyalik taniqli xonanda MakSim o‘zining mashhur taronalari bilan chiqish qiladi.

Mazkur konsert dasturiga kirish barcha uchun bepul etib belgilangan. Bayram yakunida osmonni rang-barang mushaklar yoritishi va xalq o‘yinlari o‘tkazilishi rejalashtirilgan bo‘lib, bu sayyohlar uchun unutilmas xotiralar taqdim etadi.