O‘zbekistonda nikohdan bir yil ichida ajralishni cheklash taklif etildi

O‘zbekiston Respublikasida oila institutini mustahkamlash va yoshlar orasidagi ajralishlarning oldini olish maqsadida muhim qonun loyihasi ishlab chiqildi. Bu haqda Zamin.uz xabar berdi.

Oila va xotin-qizlar vazirligi tomonidan taklif qilingan ushbu hujjatga ko‘ra, nikohdan bir yil o‘tmaganda er-xotinlar sudga ajralish uchun murojaat qilishi vaqtincha cheklanadi. Bu qoida asosan oilaviy muhitni barqarorlashtirish va shoshilinch qarorlar qabul qilishni kamaytirishga xizmat qiladi.

Biroq, bu cheklov oilada maishiy zavoronlik yoki jiddiy hayot xavfi tug‘ilgan holatlarda amal qilmaydi. Bunday vaziyatda sud tezroq qaror chiqaradi va oila a’zolarini himoya qiladi.

Qonun loyihasida Fuqarolik protsessual kodeksiga yangi band kiritish taklif etilgan. Masalan, ayol homilador bo‘lgan paytda yoki farzand tug‘ilganidan keyin bir yil ichida eri roziligisiz nikohni buzish arizalari rad etiladi.

Bundan tashqari, sudlarga ajralishdan oldin er-xotinlarni yarashtirish uchun berilgan muddat olti oydan bir yilgacha uzaytiriladi. Bu vaqt davomida oilaviy nizolar chuqurroq o‘rganiladi va mutaxassislar tomonidan maslahat berish ishlarini yo‘lga qo‘yish rejalashtirilgan.

Ajralish holatida voyaga yetmagan bolalarning kelajagi, ularning qaysi ota-onasi bilan yashashi va ikkinchi ota-onaning bolalarga muloqot qilish tartibi ham aniq belgilanadi. Shuningdek, aliment tizimi jiddiy takomillashtirilishi ko‘zda tutilgan.

Bolalar uchun belgilanadigan moddiy yordam miqdori minimal iste’mol xarajatlaridan kam bo‘lmasligi shart qilinadi. Undirilgan mablag‘lar esa to‘g‘ridan-to‘g‘ri bola nomiga ochilgan bank hisobvarag‘idada jamlanadi va uning xarajatlari nazorat qilinadi.

Jarayonlarni soddalashtirish uchun ba’zi ishlar elektron hukumat tizimi orqali amalga oshiriladi. Statistika ma’lumotlariga ko‘ra, o‘tgan yillarda mamlakatimizda sud orqali ajralish hollari soni ortib bormoqda.

Ayniqsa, Toshkent shahri, Farg‘ona, Andijon va Samarqand viloyatlarida bu holat kuzatilgan. Asosiy sabablar orasida o‘zaro ishonchsizlik, nikohga to‘liq tayyor bo‘lmaslik va xiyonat holatlari turibdi.

Yangi qonun oilalarga kuchliroq quvvat berishi va jamiyatdagi barqarorlikni ta’minlashiga umid qilinmoqda.