Liverpul Luis Dias o‘rniga Rodrigoni ko‘zlamoqda
«Liverpul» jamoasi yozgi transferlar mavsumida hujumchi Luis Dias o‘rniga yangi futbolchi izlamoqda. Bu haqida Euro-football.ru xabar berdi.
Luis Dias jamoani tark etishi mumkinligi sababli, klub uning o‘rnini to‘ldirishni rejalashtirmoqda. Kolumbiyalik futbolchiga «Bavariya» klubi qiziqish bildirgan bo‘lsa, Saudiya Arabistonining chempionati vakillari ham uning transferiga tayyor turibdi.
TEAMtalk manbasiga ko‘ra, «Liverpul» hujumchini almashtirish uchun Madridning «Real» klubidan Rodrigoni birinchi o‘rinli nomzod sifatida ko‘rsatmoqda. Biroq, ushbu transferni amalga oshirish oson bo‘lmaydi, chunki «Real» 24 yoshli braziliyalik futbolchidan kamida 100 million yevro talab qilmoqda.
Luis Diasning Transfermarkt saytidagi bahosi 70 million yevroni tashkil etsa, Rodrigoning qiymati 90 million yevro atrofida baholanmoqda. Rodrigoni olish uchun Londondagi «Arsenal» klubi ham uzoq vaqt davomida kurash olib borgan.
Shu bois, «Liverpul» uchun ushbu transfer murakkab va qimmatga tushadigan jarayon bo‘lishi kutilmoqda. Klub rahbariyati va mutaxassislari eng yaxshi variantni tanlash uchun faol ish olib bormoqda.
