Bashakshehir Fayzullayev transferi uchun CSKAga hali to‘lamadi

Turkiyaning Istanbul Bashakshehir futbol klubi hozircha Moskvaning CSKA jamoasiga futbolchi Abbosbek Fayzullayevning transferi uchun to‘liq hisob-kitob qilgani yo‘q. Bu haqida Euro-football.ru xabar berdi.

Bu haqda CSKA klubi vakili Kirill Breydo ma’lum qildi. Uning so‘zlariga ko‘ra, hozirda Moskva klubi va Istanbul Bashakshehir o‘rtasida yozishmalar davom etmoqda.

Klub vakili pul bu haftada kelishini kutayotganini bildirdi. Abbsoek Fayzullayev bu yil iyul oyining oxirida Moskva klubini tark etgan edi.

U turk jamoasi bilan besh yillik mehnat shartnomasini imzolagan. Transfermarkt portali ma’lumotiga ko‘ra, Fayzullayevning transferi Istanbul Bashakshehir klubiga sakkiz million yevroga tushgan.

Hozircha CSKA klubi ushbu mablag‘ni to‘liq olgani yo‘q. Eslatib o‘tamiz, Abbosbek Fayzullayev 21 yoshda bo‘lib, u o‘zining yoshiga qaramay, bir necha mavsum davomida Moskvaning CSKA jamoasida asosiy tarkib futbolchisi sifatida maydonga tushgan.

Uning Turkiya chempionatiga o‘tishi futbolchining faoliyatida yangi bosqich bo‘lishi kutilmoqda. Klub vakillari transfer bo‘yicha barcha moliyaviy masalalar tez orada hal etilishiga umid qilmoqda.