Rossiya noyabrda Peru va Chili bilan o‘ynaydi

Rossiya terma jamoasining noyabr oyidagi o‘yinlar dasturi kengaytirildi. Bu haqida Euro-football.ru xabar berdi.

2025 yilning yakuniy yig‘ini doirasida Valeriy Karpin boshchiligidagi jamoa Peru va Chili terma jamoalariga qarshi maydonga tushadi. Rossiya va Peru o‘rtasidagi uchrashuv 12 noyabr kuni Sankt-Peterburg shahridagi Gazprom Arenada bo‘lib o‘tadi.

Rossiya va Chili terma jamoalari o‘rtasidagi o‘yin esa 15 noyabrda Sochi shahridagi Fisht stadionida o‘tkaziladi. Shuningdek, Peru va Chili terma jamoalari ham o‘zaro bahs olib boradi.

Bu uchrashuv 18 noyabr kuni Sochi shahrida bo‘lib o‘tadi. Shu tariqa, uchta milliy jamoa ishtirokida do‘stlik turniri tashkil etiladi.

Ma’lumki, Rossiya futbol ittifoqi so‘nggi uch yarim yil davomida cheklovlar ostida faoliyat yuritmoqda. Shu sababli Rossiya terma jamoasi faqat o‘rtoqlik uchrashuvlarida ishtirok etish imkoniga ega.

Ushbu uchrashuvlar xalqaro musobaqalarga tayyorgarlik doirasida o‘tkaziladi va jamoaning sport formasini saqlab turishga xizmat qiladi.