Olimlar quyosh panellarini ishlab chiqarishning yangi usulini kashf etdi
Germaniyaning Karlsrue texnologiya instituti hamda Ispaniyaning Valensiya universiteti tadqiqotchilari quyosh panellarini tayyorlashning mutlaqo yangi usulini kashf etdilar. Bu haqda Zamin.uz xabar berdi.
Ushbu texnologiya kelajak avlod qurilmalarini ishlab chiqarish jarayonini sezilarli darajada arzonlashtirishi va tezlashtirishi kutilmoqda. Gap perovskit va kremniy asosidagi tandemli quyosh elementlari haqida bormoqda.
Bunday panellar oddiy kremniy asosi ustiga qo‘shimcha perovskit qatlami yotqizilishi bilan ajralib turadi. Mazkur yondashuv an’anaviy kremniy elementlariga qaraganda quyosh nurini ko‘proq qamrab olish va foydali ish koeffitsiyentini sezilarli darajada oshirish imkonini beradi.
Olimlarning asosiy yutug‘i perovskit qatlamini yuzaga joylashtirishning yangi vakuumli usulini ishlab chiqqanliklaridir. Ilgari bunday jarayonlar o‘ta murakkab va sekin kechib, ommaviy ishlab chiqarish talablariga javob bermas edi.
Endilikda esa zaruriy ishchi qatlamni shakllantirish uchun bor-yo‘g‘i o‘n daqiqa vaqt sarflanadi. Yangi texnologiyaning ishlash tamoyili quyidagicha: maxsus organik moddalar vakuum muhitida bug‘lantiriladi, so‘ngra ularning zarralari bir necha millimetr masofani bosib o‘tib, kremniy plastinasiga bir tekisda o‘tiradi.
Natijada yupqa va samarador ishchi qatlam hosil bo‘ladi. Ushbu usul o‘zining universalligi bilan ajralib turadi, ya’ni uni qo‘shimcha uskunalarsiz turli turdagi kremniy asoslarida qo‘llash mumkin.
Bu esa sanoat korxonalari uchun juda qulay va tejamkor yechim hisoblanadi. O‘tkazilgan tajribalar davomida yangi turdagi quyosh elementlari juda yuqori samaradorlik ko‘rsatkichlarini namoyon etdi.
Bugungi kunda standart kremniy panellari o‘zining imkoniyat darajasiga yetib kelgan bir paytda, ushbu yangilik quyosh energetikasi sohasida katta burilish yasashi kutilmoqda. Yangi texnologiyaning yana bir muhim afzalligi uning iqtisodiy tejamkorligidir.
Mazkur usul kamroq qimmatbaho xomashyo talab qiladi va ayrim tarkibiy qismlarni qayta ishlatish imkonini beradi, bu esa atrof-muhit muhofazasi uchun ham foydalidir.
