O'zbekiston 2025-yilning birinchi choragida 115,1 million dollarlik xorijiy yengil avtomobillarni import qildi, deb upl.uz sayti xabar berdi.
Davlat statistika qo‘mitasi ma’lumotlariga ko‘ra, yanvar–mart oylarida mamlakatga 6 950 dona yengil avtomobil olib kirilgan. Eng katta yetkazib beruvchi davlat – Xitoy bo‘lib, u yerdan 5 235 ta avtomobil import qilingan.
Ikkinchi o‘rinda Janubiy Koreya turibdi — u 1 425 dona avtomobil yetkazgan. Qolgan davlatlar hissasi quyidagicha: Hindiston – 144 ta, Yaponiya – 77 ta, AQSh – 18 ta. Yana 51 ta avtomobil boshqa mamlakatlardan olib kelingan.
Bu raqamlar Xitoyning O'zbekiston avtomobil bozoridagi mavqeini mustahkamlab borayotganini ko‘rsatadi. U boshqa eksportchilardan ancha oldinda bormoqda.
Ma’lumot uchun, 2024-yilda Xitoy dunyodagi eng yirik avtomobil eksportchisi bo‘lib, Yaponiyani ortda qoldirgan. O‘zbekistonda BYD va Chery kabi Xitoy brendlari zamonaviy texnologiyalar va arzon narxlar bilan bozorda tez kengaymoqda.
