Qirg‘izistonda Chevrolet Tahoe va Damas avtomobillarini ishlab chiqarish boshlandi
Qirgizistonning avtomobilsozlik sanoatida muhim yangilik yuz berdi. Bu haqda Zamin.uz xabar berdi.
Mamlakatdagi Tulpar Motors zavodida Chevrolet brendining eng nufuzli modellaridan biri bo‘lgan Tahoe yo‘ltanlamasi hamda kichik biznes uchun mo‘ljallangan Damas avtomobillarini ishlab chiqarish rasman boshlandi. Sakkiz silindrli, dvigatel hajmi 6,2 litr va quvvati 420 ot kuchiga teng bo‘lgan Tahoe modeli mazkur korxonada yig‘ilayotgan oltinchi avtomobil turiga aylandi.
E’tiborli jihati shundaki, zavod ish boshlaganiga hali ikki yil to‘lmasdan Cobalt, Onix, Tracker va Captiva kabi ommabop modellarni o‘zlashtirishga muvaffaq bo‘ldi. Bu haqda mahalliy ommaviy axborot vositalari xabar bermoqda.
Tulpar Motors zavodi qo‘shni respublika iqtisodiyotida yangi sahifa ochdi. O‘tgan yil davomida korxona tomonidan 1 680 dona transport vositasi sotuvga chiqarildi.
Bozordagi talab tahlil qilinganda, Chevrolet Cobalt eng ko‘p sotilgan avtomobil, Chevrolet Tracker esa eng xaridorgir krossover sifatida e’tirof etildi. Kelgusi rejalarga ko‘ra, 2025-yil yakuniga qadar ishlab chiqarish hajmi 5 milliard somga yetkaziladi.
Joriy yilning o‘zida esa kamida 3 000 dona avtomobil yig‘ish maqsad qilingan. Kompaniya rahbariyati zavodning noldan barpo etilganini, barcha logistika tizimlari va servis xizmatlari to‘liq yo‘lga qo‘yilganini ta’kidlamoqda.
2026-yilga borib mamlakat bo‘ylab o‘nta savdo nuqtasi va hududiy texnik xizmat ko‘rsatish markazlari ochilishi rejalashtirilgan. Shuningdek, aholi uchun qulay moliyaviy imkoniyatlar yaratilmoqda.
Xususan, fuqarolarga avtokreditlar yillik 8 foiz, davlat xizmatchilari uchun esa imtiyozli ravishda 4 foiz stavkada taklif etilmoqda. AQShning Qirgizistondagi rasmiy vakillari ushbu hamkorlik ikki davlat o‘rtasidagi iqtisodiy aloqalarni mustahkamlashga xizmat qilishini qayd etishdi.
Tulpar Motors yaqin istiqbolda o‘z mahsulotlari turini yanada ko‘paytirishni niyat qilgan. Kelajakda Suburban va Traverse kabi yirik modellar bilan bir qatorda, ekologik jihatdan tejamkor bo‘lgan Captiva PHEV gibrid avtomobillarini ham ishlab chiqarish yo‘lga qo‘yilishi kutilmoqda.
Bu esa mintaqada avtomobil bozorining yanada rivojlanishiga turtki beradi.
