O‘zbekiston Respublikasi Oliy Majlisi Qonunchilik palatasi deputati, Demokratik partiya «Milliy tiklanish» yetakchisi Alisher Qodirov yaqinda parlament muhokamasiga taqdim etilishi mumkin bo‘lgan tashabbusni ma’lum qildi. Bu haqida Upl.uz xabar berdi.
Unga ko‘ra, 40-50 yildan ortiq bo‘lgan avtomobillarni bosqichma-bosqich ekspluatatsiyadan chiqarish taklif qilinmoqda. Alisher Qodirovning fikricha, 40-50 yillik avtomobillarni ekspluatatsiyadan chiqarish to‘g‘ri qaror bo‘ladi.
Hatto 25-30 yillik avtomobillar uchun ham cheklov joriy etish noto‘g‘ri bo‘lmaydi. Bunda eng muhimi, avtomobil egalariga qulay almashtirish imkoniyatlari taqdim etilishi lozim.
Shuningdek, deputat tezlik chegaralarini joylashuv, vaqt va zaruratga qarab belgilashni taklif qildi. Masalan, avtomagistralda, ya’ni aholi punktlaridan uzoq va uzun masofalar uchun soatiga 130 kilometr tezlikda harakatlanishga ruxsat berilishi mumkinligi savol sifatida ko‘tarildi.
Ushbu tashabbuslar yo‘l harakati xavfsizligini oshirishga xizmat qiladi va zamonaviy transport siyosatini shakllantirishda muhim ahamiyatga ega.
