Toshkent viloyati, Bo‘stonliq tumanidagi 72,6 sotix noturar yer maydonini 1 mln dollarga sotmoqchi bo‘lgan shaxs qo‘lga olindi. Bu haqda IIV xabar berdi.
Qayd qilinishicha, Toshkent shahrining Bektemir tumanida 12 mart kuni tezkor tadbir o‘tkazilgan. Unda 1992 yilda tug‘ilgan, rieltorlik faoliyati bilan shug‘ullanuvchi shaxs ushlangan. U Toshkent viloyati, Bo‘stonliq tumanidagi 72,6 sotix noturar yer maydonini 1 mln dollarga sotmoqchi bo‘lgan.
Shuningdek, yuqori lavozimda ishlovchi tanishlari orqali 1 oyda ushbu yer maydoni toifasini turar joyga o‘zgartirib, ko‘pqavatli uy-joy qurish uchun ruxsatnomani va barcha hujjatlarni rasmiylashtirib berish evaziga 100 ming dollar talab qilgan. Shundan so‘ng, avans tariqasida 110 ming dollar olgan vaqtida ushlangan.
Shuningdek, Toshkent shahri, Olmazor tumanida o‘tkazilgan tezkor tadbirda qarzdorlik bo‘yicha MIB yuritayotgan ijro hujjatlarini tugatish evaziga katta miqdorda pul talab qilgan shaxs qo‘lga olingan. U fuqaroning 647 mln so‘m miqdoridagi qarzdorlik bo‘yicha ijro hujjatlarini tugatish va O‘zbekistondan chiqish uchun qo‘yilgan taqiqni yechib berish evaziga 25 ming dollar talab qilib olganida ushlangan.
Holat bo‘yicha Jinoyat kodeksining 168-moddasi 4-qismi “a” bandi (firibgarlik juda ko‘p miqdorda), 211-moddasi 3-qismi “a” bandi (pora berish juda ko‘p miqdorda) bilan jinoyat ishi qo‘zg‘atilib, gumonlanuvchiga nisbatan qamoq ehtiyot chorasi qo‘llangan.
