26 yoshli «Bavariya» jamoasining markaziy himoyachisi Dayo Upamekano shartnomasini uzaytirish uchun maoshining sezilarli darajada oshirilishini talab qilmoqda. Bu haqida Euro-football.ru xabar berdi.
L'Equipe nashrining ma’lumotlariga ko‘ra, fransuz futbolchisi o‘zining jamoadagi mavqeiga mos keladigan darajada haq olmoqchi. Upamekano klubdagi hozirgi holatidan mamnun bo‘lib, bosh murabbiy Vensan Kompani bilan yaxshi munosabatda.
Shunga qaramay, u hozirgi maoshini o‘zining jamoa uchun muhim futbolchi sifatidagi o‘rniga mos kelmaydi deb hisoblaydi. Hozirda tomonlar o‘rtasida muzokaralar davom etmoqda va kelishuvga erishish uchun biroz vaqt kerak bo‘ladi.
O‘tgan mavsumda Dayo Upamekano «Bavariya» safida 38 ta o‘yinda maydonga tushib, ikki gol urdi va ikki golli uzatma amalga oshirdi. Uning amaldagi shartnomasi 2026 yil yozigacha mo‘ljallangan.
Transfermarkt sayti futbolchining bozor qiymatini 50 million yevroga baholamoqda. Upamekanoning maosh masalasidagi talablar jamoa rahbariyati uchun muhim vazifa bo‘lib, kelgusida uning jamoada qolishi yoki boshqa klublarga o‘tishi borasida qaror qabul qilinadi.
