Peterburglik Zenit jamoasining yarim himoyachisi Vendel Braziliyaning Flamengo klubi bilan shartnoma imzolash bo‘yicha muzokaralar olib bormoqda. Bu haqida Euro-football.ru xabar berdi.
Hozircha muzokaralar tafsilotlari oshkor qilinmagan, ammo kelishuv ehtimoli mavjudligi tasdiqlanmoqda. Vendel yaqinda o‘z vatani safaridan so‘ng Zenit jamoasiga qo‘shilgan va shu sababli jamoaning mavsumoldi tayyorgarligidan deyarli chetda qolgan.
Zenit bosh murabbiyi Sergey Semak bergan intervyusida klub braziliyalik futbolchiga yangi faoliyat imkoniyatini qidirayotganini aytdi. 2024/25 yilgi mavsumda 27 yoshli yarim himoyachi Zenit safida 27 ta o‘yinda maydonga tushib, 2 ta gol urdi va 13 ta golli uzatma berdi.
U jamoaning eng ijodkor futbolchilaridan hisoblanadi. Vendel bilan Zenit o‘rtasidagi amaldagi shartnoma 2028 yil yozigacha mo‘ljallangan.
Transfermarkt ma’lumotiga ko‘ra, uning bozor qiymati 18 million yevroga teng.
