"Liverpul" jamoasi tarkibini kuchaytirishda davom etmoqda. Bu haqida Euro-football.ru xabar berdi.
Yaqin kunlarda murabbiy Arne Slot boshchiligidagi jamoaga Italiyadan 18 yoshli iqtidorli futbolchi Jovanni Leoni qo‘shiladi. U hozirda "Parma" klubi sharafini himoya qilmoqda.
Mashhur sport jurnalisti Fabrizio Romano bergan ma’lumotlarga ko‘ra, ushbu transfer bo‘yicha kelishuvga erishilgan, barcha hujjatlar rasmiylashtirilgan. Markaziy himoyachi Jovanni Leoni payshanba kuni Angliyaga yetib kelishi va tibbiy ko‘rikdan o‘tib, "Liverpul" bilan shartnoma imzolashi kutilmoqda.
Transfer narxi 35 million yevro etib belgilangan. Shuningdek, "Parma" kelajakda futbolchi boshqa klubga sotilsa, ushbu transferdan ham ma’lum miqdorda daromad oladi.
"Liverpul" rahbariyati Jovanni Leonini boshqa jamoaga ijaraga berishni rejalashtirmayapti. Yosh futbolchining o‘zi esa asosiy tarkibdan o‘rin olish uchun kurash olib boradi.
Klub rahbariyati uning iste’dodiga ishonmoqda va uni jamoaning muhim a’zosi sifatida ko‘rmoqda. Shu bilan birga, "Liverpul" yosh futbolchilarni jalb qilish va ularni rivojlantirish siyosatini davom ettirmoqda.
