“Manchester Siti” klubi himoyachisi Abduqodir Husanov nomi bilan bog‘liq yangi brend — “AK45” nomli energetik ichimlik ishlab chiqarilayotgani haqida xabarlar tarqaldi. Brend nomi futbolchining ismi bosh harflari va u kiyadigan futbolkada aks etgan 45-raqam asosida tanlangani aytilmoqda.
Hozircha Husanov ushbu mahsulot bilan bevosita hamkorlik qilayotgani yoki yo‘qligi rasman tasdiqlanmagan. Shunga qaramay, futbolchining rasmiy Instagram akkaunti — @ak45sila sahifasiga obuna ekani kuzatilgan.
Qayd etilishicha, “AK45” ichimligining ilk namunasi futbolchining to‘y marosimida namoyish etilgan.
Ma’lumot uchun, Husanov “Manchester Siti” safida so‘nggi bor 30 mart kuni “Brayton” jamoasiga qarshi bahsda maydonga tushgan edi. Shundan buyon u 11ta o‘yinning yarmida zaxirada qolgan, qolganida esa tarkibga kiritilmagan. Ayni vaqtda u O‘zbekiston milliy terma jamoasi bilan yig‘inda ishtirok etmoqda.
