Xabi Alonso PSJga mag‘lubiyatdan keyin fikr bildirdi

Madridning “Real” jamoasi bosh murabbiyi Xabi Alonso Klublar o‘rtasidagi Jahon chempionati yarim finalida “PSJ”ga qarshi (0:4) o‘tkazilgan o‘yindan keyingi fikrlarini bildirdi. Bu haqida Euro-football.ru xabar berdi.

Uchrashuvning 24-daqiqasiga kelib, fransuzlar jamoasi uchta gol urib, hisobda katta ustunlikka erishdi. O‘yinning oxirida esa “PSJ” to‘rtinchi golni kiritib, madridliklarni mag‘lub etdi.

Alonso so‘zlariga ko‘ra, jamoa bu o‘yindan ko‘p narsani o‘rganishi va xatolarni tahlil qilishi lozim. U jamoaning hozirgi darajasini va kelajakda erishmoqchi bo‘lgan maqsadlarini yaxshi anglab oldiklarini ta’kidladi.

“PSJ” – ikki yil davomida shakllangan kuchli jamoa, biz esa hali o‘z yo‘limizni boshlayapmiz. Bugungi o‘yin juda qiyin bo‘ldi, raqib ko‘plab muammolar tug‘dirdi va biz undan yaxshi o‘ynashimiz kerak edi.

Shunga qaramay, ba’zi ijobiy jihatlarni ko‘rdik va kelajakda ulardan foyda olamiz, dedi Alonso. 13 iyul kuni “PSJ” Jahon chempionati finalida “Chelsi” jamoasi bilan o‘ynaydi.