O‘zbekiston Respublikasi Ichki ishlar vazirligi yozgi mavsumda oynalarni tonirovka qilish uchun ruxsatnoma olish jarayonini soddalashtirishga qaratilgan yangi loyiha taqdim etdi. Bu haqida Upl.uz xabar berdi.
Ushbu hujjatda M1 toifasidagi avtomobillarning old va orqa yon oynalarini qisqa muddatli tonirovka qilish ruxsatnomasini joriy etish taklif qilinmoqda. Asosiy o‘zgarish – jismoniy va yuridik shaxslar uchun ruxsatnoma narxining sakkiz barobar kamaytirilishi hisoblanadi.
Yangi ruxsatnoma har yili 1 maydan 31 avgustgacha amal qiladi va narxi faqat bitta bazaviy hisoblash qiymatini tashkil etadi. M1 toifasi – bu haydovchi o‘rnidan tashqari sakkizdan ortiq bo‘lmagan o‘rindiqlarga ega yo‘lovchi tashish vositalaridir.
Qisqa muddatli ruxsatnoma narxlari quyidagicha bo‘ladi: O‘zbekiston fuqarolari va kompaniyalari uchun 1 bazaviy hisoblash qiymati, xorijiy yuridik shaxslar uchun esa 5 bazaviy hisoblash qiymati. To‘lov ruxsatnoma berilgan sanadan qat’i nazar to‘liq amalga oshiriladi.
Shu bilan birga, old va orqa yon oynalarning bir yillik tonirovka ruxsatnomasi narxi avvalgidek qoladi, ya’ni jismoniy va yuridik shaxslar uchun 8 bazaviy hisoblash qiymati, xorijiy yuridik shaxslar uchun esa 14 bazaviy hisoblash qiymati. Loyiha hozirda muhokama bosqichida bo‘lib, muhokamalar 22 avgustga qadar davom etadi.
