Fransiyaning mashhur avtomobilsozlik kompaniyasi Citroеn yangi, ikkinchi avlod C5 Aircross krossoverini keng jamoatchilikka tanishtirdi. Yangi model brendinging zamonaviy uslubidagi dizayni, yangi tor old chiroqlar hamda zamonaviy orqa faralar bilan ajralib turadi. Bu dizaynni avvalroq kompaniyaning C4 (2024) modelida ham ko‘rish mumkin edi.
Yangilangan salonda ortiqcha elementlarga o‘rin qoldirilmagan bo‘lib, barchasi oddiy, qulay va eng muhimi, zamonaviy texnologiyalar bilan boyitilgan. Intererning asosiy qismi bo‘lgan katta vertikal ekran bilan jihozlangan markaziy konsol diqqatni jalb etadi. Citroеn vakillarining ma’lum qilishicha, ushbu ekran hozircha Stellantis avtokonserniga tegishli barcha avtomobillar orasida eng kattasi hisoblanadi.
Bundan tashqari, salondagi 10 dyuymli raqamli asboblar paneli, atrofni yorituvchi ambiyent yoritgichlari, simsiz zaryadlash tizimi hamda panorama lyuki kabi qulayliklar ham mavjud. Yangilangan C5 Aircross yana bir muhim jihatga ega – uning axborot-ko‘ngilochar tizimida sun’iy intellekt asosidagi ChatGPT xizmatidan foydalanish imkoniyati mavjud.
Ikkinchi avlod C5 Aircross Stellantis konsernining yangi STLA Medium platformasida yaratilgan. U sotuvga ikki xil versiyada chiqadi – to‘liq elektrli va gibrid variantlarda.
Elektrli modifikatsiyasining asosiy varianti 210 ot kuchiga ega bo‘lib, to‘liq quvvatda bir marta quvvatlangan holda 520 km yo‘l bosib o‘ta oladi. Bundan tashqari, yanada kuchliroq, ya’ni 230 ot kuchiga ega bo‘lgan, bir marta quvvatlanishda 680 km yo‘l bosish imkonini beradigan quvvatliroq modifikatsiyasi ham sotuvga chiqariladi.
Gibrid modellarda 1,2 litr hajmga ega benzinli ichki yonuv dvigateli va elektr motor o‘rnatiladi, ularning umumiy quvvati 148 ot kuchini tashkil qiladi. Shuningdek, 1,6 litrli dvigatel bilan ta’minlangan va umumiy quvvati 195 ot kuchiga ega yana bir modifikatsiya ham sotuvga chiqadi. Gibrid modellarning faqat elektr motoridan foydalangan holda bosib o‘ta oladigan masofasi 85 kilometrni tashkil qiladi.
Yangilangan Citroеn C5 Aircross Yevropa bozorida 2025 yilning ikkinchi yarmidan sotuvga chiqariladi. Uning narxlari hozircha rasman e’lon qilinganicha yo‘q. Avtomobilsozlik jamoatchiligi ushbu model xaridorlar tomonidan katta qiziqish bilan kutilayotganini ta’kidlamoqda.
