Xitoyning mashhur avtomobil ishlab chiqaruvchi kompaniyalaridan biri sanalgan Li Auto Rossiyada rasman faoliyatini boshladi. Bu haqda kompaniya matbuot xizmati rasmiy bayonot berdi va ushbu voqeani iste’molchilar uchun muhim bir yangilik sifatida e’lon qildi.
Li Auto kompaniyasining Rossiyadagi rasmiy veb-sayti ishga tushirildi. Bu iste’molchilarni turli noqonuniy kanallar va “kulrang” ta’minot sxemalaridan himoya qilish maqsadida amalga oshirilgan jiddiy qadam sifatida baholanmoqda. Endilikda iste’molchilar ushbu rasmiy sayt orqali kompaniyaning turli modellari, xizmatlari, texnik tavsiflari va narxlari haqida keng qamrovli ma’lumotga ega bo‘lishi mumkin.
“Biz Rossiyada Li Auto‘ning rasmiy saytini ishga tushirganimizdan mamnunmiz. Ushbu qaror iste’molchilarni noqonuniy mahsulot yetkazib berish yo‘llaridan muhofaza qilish va sotuv jarayonidagi shaffoflikni oshirish yo‘lidagi muhim bosqichdir. Bundan buyon har qanday faoliyat faqat rasmiy va vakolatli dilerlar orqali amalga oshiriladi”, – dedi Rossiyadagi Sinomach Auto dilerlik tarmog‘ini rivojlantirish departamenti rahbari Dmitriy Rotkin.
Kompaniya veb-saytida avtomobillarning batafsil tavsiflari, so‘nggi modellar haqida yangiliklar, texnik xususiyatlar, shuningdek, narxlar va rasmiy dilerlar bilan bog‘lanish imkoniyati mavjud. Shu bilan birga, sayt orqali iste’molchilarga sinov drayviga yozilish imkoniyati ham taqdim qilingan.
15 may kunidan boshlab kompaniya barcha parallel import kanallarini rasman to‘xtatgan. Endi kompaniyaning avtomobillari faqat Sinomach Auto orqali rasmiy sotuvga chiqariladi. Bu orqali Li Auto mahsulotlarining sifati kafolatlanadi va xaridorlar manfaati himoya qilinadi.
Sinomach Auto va Li Auto rahbariyati 21 may kuni Moskvadagi «Xuamin» biznes markazida o‘tadigan ilk dilerlik konferensiyasida ushbu “kulrang” sxemalarga qarshi kurash bo‘yicha boshqa chora-tadbirlarni ham e’lon qiladi. Bu tadbir Rossiya bozoridagi Li Auto kompaniyasining yangi bosqichini boshlab beradigan muhim voqea bo‘lishi kutilmoqda.
Zamin.uz tahririyati avtomobil olamidagi ushbu muhim yangiliklarni diqqat bilan kuzatib boradi. Siz rasmiy dilerlik tizimi orqali avtomobil sotishning afzalliklari haqida qanday fikrdasiz?
