2025 yil 12 iyuldan boshlab Toshkent viloyatining Bostanliq tumanida yuk avtomobillari harakatiga vaqtinchalik cheklovlar joriy etildi. Bu haqida Upl.uz xabar berdi.
Ushbu chora yo‘l harakati xavfsizligini oshirish, yo‘l-transport hodisalarining oldini olish, sayyohlar va dam oluvchilar uchun qulaylik yaratish hamda dam olish maskanlariga olib boruvchi mashhur qishloq yo‘llaridagi tirbandliklarni kamaytirishga qaratilgan. Yangi qoidalarga muvofiq, har kuni soat 7:00 dan 22:00 gacha yuk avtomobillari quyidagi asosiy yo‘l bo‘laklarida harakatlanishi taqiqlanadi: D006 «Toshkent — Chirchiq — Chimgan» avtomobil yo‘lida 48-kilometr (G‘azalkent)dan 83-kilometrgacha (Yusufxona mahallasi); D010 «Chorvoq suv ombori halq yo‘li»da 1-kilometr (Bochka hududi)dan 11-kilometrgacha (Yusufxona) hamda 62-kilometr (Sijjak mahallasi)dan 80-kilometrgacha; shuningdek, mahalliy ahamiyatga ega 10V167b yo‘lida, «Aktash» sanatoriyasiga olib boruvchi yo‘lda 1-kilometrdan 7-kilometrgacha.
Ushbu yo‘l bo‘laklarida yuk avtomobillari harakatini taqiqlovchi 3.4 raqamli yo‘l belgisi o‘rnatilgan. Hokimiyat organlari barcha yo‘l harakati ishtirokchilaridan belgilangan tartibga qat’iy rioya qilishni va yo‘l harakati cheklovlarini hisobga olgan holda marshrutlarni rejalashtirishni so‘ramoqda.
👍 0❤️ 0😂 0😢 0😡 0
