Turkiyada «layk» bosish nikohga xavf sifatida baholandi
Turkiyada oilaviy nizolar bo‘yicha sud qarorlarida yangi davr boshlandi. Bu haqda Zamin.uz xabar berdi.
Mamlakatda fuqarolik ishlari bo‘yicha sudning apellyatsiya palatasi yaqinda chiqargan qaror bu borada katta muhokamalarga sabab bo‘ldi. Endilikda ijtimoiy tarmoqlarda boshqa ayollarning fotosuratlariga «layk» bosish nikoh barqarorligiga xavf tug‘diruvchi omil sifatida baholanishi mumkin.
Mazkur ish Qaysari shahrida bir oilaviy nizo bilan bog‘liq holda ko‘rib chiqilgan. Ayol sudga murojaat qilib, erining boshqa ayollar suratlariga «layk» bosishini hurmatsizlik va oilaviy ishonchni zaiflashtiruvchi omil sifatida ko‘rsatdi.
Shuningdek, u moliyaviy yordamning yo‘qligidan shikoyat qilib, 5 ming turk lirasi aliment va yarim million liradan ortiq moddiy zarar talab qildi. Er esa bu ayblovlarni rad etib, aksincha, xotinini otasiga nisbatan haqorat qilishda aybladi va uning o‘ta rashkchi ekanini ta’kidladi.
U ham 500 ming lira miqdorida ma’naviy zarar talab qildi. Sudning birinchi instansiyasi erni nikohning buzilishida «og‘ir aybdor» deb topdi va unga xotinga 40 ming lira moddiy zarar, 40 ming lira ma’naviy zarar va 750 lira aliment to‘lash majburiyatini yukladi.
Er bu qarordan norozi bo‘lib, apellyatsiyaga murojaat qildi. Biroq yuqori instansiya ham ayolning da’vosini qisman tasdiqladi.
Faqat kompensatsiya miqdorini 30 ming liraga qisqartirdi, aliment esa 1000 liragacha oshirildi. Sud qarorida ta’kidlanganidek, «layk» bosish o‘z-o‘zidan xiyonat hisoblanmasa-da, nikohdagi ishonchni zaiflashtiruvchi psixologik ta’sir ko‘rsatishi mumkin.
Bu qaror Turkiyada onlayn xatti-harakatlar — layk, izoh, repost kabi harakatlarning oilaviy munosabatlarga ta’sirini baholashda muhim omil sifatida qabul qilinishini anglatadi. Natijada bunday xatti-harakatlar moliyaviy oqibatlarga, jumladan, kompensatsiya va aliment miqdoriga ham ta’sir ko‘rsatishi mumkin.
Yuristlar fikricha, mazkur qaror kelgusida oilaviy nizolarning ko‘pchiligida onlayn faoliyatni asosiy dalil sifatida keltirish ehtimolini oshiradi. Raqamli izlar endi nafaqat ijtimoiy tarmoqlarda, balki huquqiy sohada ham muhim ahamiyat kasb etmoqda.
Bu esa raqamli munosabat madaniyati va uning chegaralari haqida yangi bahslar boshlanishiga sabab bo‘lishi mumkin.
