Germaniyaning Gamburg shahrida yovvoyi bo'ri ayolga hujum qildi

Germaniyaning Gamburg shahrida yovvoyi bo'ri tomonidan amalga oshirilgan hujum hayvon himoyachilari va rasmiy vakillar o'rtasida keskin bahslarga sabab bo'ldi. Bu haqda Zamin.uz xabar berdi.

Ma'lum etilishicha, yovvoyi hayvon savdo maydonchasiga bostirib kirgan va mahalliy aholining bir nafar ayoliga hujum qilgan. Voqea sodir bo'lgan paytda ayol eshikni ochmoqchi bo'lganda, bo'ri uning yuz qismidan tishlab olgan deb taxmin qilinmoqda.

Jabrlanuvchi ayol jarohatlari tufayli shifoxonaga olib borilgan va unga zarur tibbiy yordam ko'rsatilgan. Ushbu hodisadan so'ng hayvon tez orada ushlanib, maxsus hayvonlarni muhofaza qilish markaziga joylashtirildi.

Gamburg shahrining atrof-muhit masalalari bo'yicha senatori Katarina Fegebank bu holat oxirgi o'n yilliklar ichida birinchi marta yuz bergan voqea ekanligini ta'kidladi. Uning so'zlariga ko'ra, bunday hodisalar kelajakda bo'ri populyatsiyasini qayta tiklash jarayoniga salbiy ta'sir ko'rsatishi mumkin.

Shuningdek, agar hayvon yana ozod etilsa, shahar atrofida yangi hujumlar sodir bo'lishi xavfi borligini ham bildirdi. Biroq, hayvonlarni himoya qilish faollari bu voqeani boshqacha talqin qilmoqdalar va bo'ri haqiqatan ham ayolni tishlaganiga shubha bilan qarashmoqda.

Ular guvohlarning so'zlariga tayangan holda, yovvoyi hayvon ayolga sakraganini, biroq uni tishlamaganini ta'kidlashmoqda. Savdo maydonchasidagi bir tadbirkorning fikricha, bo'ri shunchaki o'z panjasi bilan ayolning yuziga urgan bo'lishi mumkin.

Faollarning e'tiroziga ko'ra, agar jarohatlar haqiqatdan ham og'ir bo'lganida, jabrlanuvchi ayol shunchaki ambulator nazoratda davolanmas edi. Shu sababli ular hayvonni tezkorlik bilan tabiatga qo'yib yuborishni talab qilmoqdalar.