Jahon banki O'zbekiston iqtisodiyoti uchun eng istiqbolli tarmoqlarni aytdi
Jahon bankining yangi tahliliy hisobotiga ko‘ra, logistika, turizm va farmatsevtika tarmoqlari O‘zbekiston iqtisodiyotining eng yuqori salohiyatga ega yo‘nalishlari hisoblanadi. Bu haqda Zamin.uz xabar berdi.
Agar ushbu sohalarda belgilangan maqsadli islohotlar muvaffaqiyatli amalga oshirilsa, mamlakatda 300 mingdan ortiq yangi ish o‘rni yaratish va milliardlab dollar hajmidagi xususiy investitsiyalarni jalb qilish imkoniyati yuzaga keladi. Mutaxassislar iqtisodiyotni rang-baranglashtirish uchun aynan ushbu uchta yo‘nalishni eng zaruriy drayverlar sifatida e’tirof etmoqda.
Jahon banki xulosasiga ko‘ra, mazkur tarmoqlar xususiy kapitalni jalb etish va bandlikni oshirish nuqtayi nazaridan eng to‘g‘ri tanlovdir. Ushbu sohalarni rivojlantirish raqobatbardosh hamda davlat emas, balki xususiy sektor yetakchilik qiladigan sog‘lom iqtisodiyotni shakllantirishga xizmat qiladi.
Logistika sohasida, ayniqsa, avtomobil yuk tashuvlari va zamonaviy ombor infratuzilmasini rivojlantirish eng ustuvor vazifa sifatida baholandi. Bu yo‘nalishda amalga oshiriladigan ishlardan bir milliard dollardan ziyod xususiy investitsiya va 108 mingga yaqin yangi ish o‘rni kutilmoqda.
Buning uchun yer ajratish va qurilish jarayonlarini soddalashtirish, ruxsatnomalarni raqamlashtirish talab etiladi. Turizm yo‘nalishida O‘zbekistonning madaniy va ekologik salohiyati hali to‘liq ishga solinmagan.
Hisob-kitoblarga ko‘ra, ushbu tarmoqqa to‘rt milliard dollardan ortiq to‘g‘ridan-to‘g‘ri sarmoya jalb qilish va 180 minggacha yangi ish o‘rni yaratish mumkin. Islohotlar doirasida yer ijarasi mexanizmlarini takomillashtirish va malakali kadrlar tayyorlash tizimini yo‘lga qo‘yish lozim.
Farmatsevtika tarmog‘i esa strategik o‘sish nuqtasi sifatida qayd etilib, mahalliy dori-darmon ishlab chiqarishni rivojlantirish iqtisodiy barqarorlikni ta’minlashda muhim rol o‘ynaydi. O‘zbekiston 2030 strategiyasi yo‘lida erishilgan yutuqlar bilan birga, hal etilishi lozim bo‘lgan tizimli muammolar ham mavjud.
2017-yildan buyon amalga oshirilgan islohotlar ishbilarmonlik muhitini yaxshilagan bo‘lsa-da, global maqsadlarga erishish uchun bozordagi sog‘lom raqobatni cheklayotgan omillarni bartaraf etish zarur. Shuningdek, mehnat bozoridagi talabga mos keluvchi malakali mutaxassislar tayyorlash va iqtisodiy jarayonlarda xususiy sektorning ulushini yanada oshirish ustuvor vazifa bo‘lib qolmoqda.
