Jizzax shahrida xorijda ishlashni orzu qilgan fuqaroni aldab, yirik miqdorda pulni o‘zlashtirgan firibgar qo‘lga olindi.
Bosh prokuratura huzuridagi Iqtisodiy jinoyatlarga qarshi kurashish departamentining shahar bo‘limi va Davlat xavfsizlik xizmati xodimlari hamkorligida o‘tkazilgan maxsus tezkor tadbir davomida, avval sudlangan fuqaro N.B. qo‘lga olindi.
Ma’lum bo‘lishicha, u o‘zini “ishonchli odam” sifatida tanishtirib, fuqaro Sh.K.ga “Meksika orqali Amerika Qo‘shma Shtatlariga ishga jo‘nataman” deb va’da bergan. Chet elda yuqori daromadli ishni qo‘lga kiritmoqchi bo‘lgan fuqaro unga ishonib, 11 200 AQSH dollari va 50 million so‘mga yaqin pul mablag‘ini topshirgan.
Ammo shubhali holatni fosh etish maqsadida tashkil etilgan tezkor tadbir vaqtida, N.B. aynan shu pullarni olayotgan paytida ashyoviy dalillar bilan ushlangan.
Ayni vaqtda mazkur holat yuzasidan Jinoyat kodeksining 168-moddasi (firibgarlik) bilan jinoyat ishi qo‘zg‘atildi va tergov harakatlari boshlab yuborildi.
Huquqni muhofaza qiluvchi organlar fuqarolarni bunday holatlarda hushyor bo‘lishga, hech qanday rasmiy kafolatsiz va ishonchsiz shaxslarga katta miqdorda pul bermaslikka chaqiradi.
Siz bu masala yuzasidan nima deb o‘ylaysiz? Qanday choralar samarali bo‘lishi mumkin?
