Viyera Arsenalni tark etib, Vest Hemga o‘tishi mumkin

Londonning Arsenal jamoasining hujumchi yarim himoyachisi Fabiu Viyera Angliya Premer Ligasi boshqa klublarining diqqat markazida turibdi. Bu haqida Euro-football.ru xabar berdi.

Arsenal jamoasi 25 yoshli futbolchiga ishonch bildirmayapti va uning transferi bo‘yicha takliflarni qabul qilishga tayyor. Jurnalist Ben Jeykobning ma’lumotiga ko‘ra, Vest Hem klubi Viyerani o‘zining transfer rejalari ro‘yxatiga qo‘shgan.

Vest Hem rahbariyati portugal futbolchisiga qiziqish bildirayotgan bo‘lsa-da, hozircha rasmiy muzokaralar boshlanmagan. O‘tgan mavsumda Fabiu Viyera ijarada Portugaliyaning Porto klubida to‘p surdi.

U Porto jamoasi safida 42 o‘yinda maydonga tushib, beshta gol urdi va olti golga assistentlik qildi. Transfermarkt sayti bahosiga ko‘ra, futbolchining bozor qiymati taxminan 22 million yevroni tashkil etadi.

Hozirda Arsenal uni sotishga tayyor va yangi jamoa bilan kelishuvga erishish imkoniyatini izlamoqda. Bu holat futbolchining faoliyatida yangi sahifa ochilishi mumkinligini ko‘rsatmoqda.