Madridning “Real” va Italiya “Milan” klublarida to‘p surgan sobiq hujumchi Luka Yovich o‘z faoliyatini Meksika chempionatida davom ettirishi mumkin. Bu haqida Euro-football.ru xabar berdi.
Serbiyalik futbolchiga “Krus Asul” klubi taklif bilan chiqqan, ammo u hali yakuniy qaror qabul qilmaganligi haqida jurnalist Fabrizio Romano ijtimoiy tarmoqlarda ma’lum qilgan. Yovich oilasi bilan maslahatlashmoqda va hozircha klub rahbariyatiga javob bermagan.
Avvalroq, futbolchi Moskva “Spartak” klubiga taklif qilingan, biroq “qizil-oq” jamoasi uning xizmatlaridan voz kechgan. 2024/2025 yilgi mavsumda Yovich “Milan” safida Seriya A va Italiya Kubogida jami 17 o‘yin o‘tkazib, to‘rtta gol urgan.
Hozirda 27 yoshli hujumchi erkin agent hisoblanadi. Uning bozor qiymati 4,5 million yevroni tashkil etadi.
